Ҷонибдории наздик ба бист масъала аз сӯи аъзои Маҷлиси миллӣ

ДУШАНБЕ, 12.07.2017 /АМИТ «Ховар»/. Наздик ба 20 масъалаи марбут ба ҳаёти сиёсию иқтисодӣ ва иҷтимоию фарҳангии Ҷумҳурии Тоҷикистон 12 июл дар иҷлосияи  ёздаҳуми Маҷлиси миллии  Маҷлиси Олии Ҷумҳурии Тоҷикистон даъвати панҷум, ки дар шаҳри Душанбе баргузор гардид, баррасӣ ва ҷонибдорӣ  шуданд.

Хабарнигори АМИТ «Ховар» аз Маҷлиси Миллӣ  иттилоъ медиҳад, ки аъзои палатаи болоии Парлумони  Тоҷикистон  чор қонуни конститутсионии Ҷумҳурии Тоҷикистон — «Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон», «Дар бораи Маҷлиси  Олии Ҷумҳурии Тоҷикистон», «Дар бораи вазъи ҳуқуқии  узви Маҷлиси миллӣ ва вакили  Маҷлиси намояндагони Маҷлиси Олии  Ҷумҳурии Тоҷикистон», «Дар бораи Ҳукумати  Ҷумҳурии Тоҷикистон»,   ду қонуни наву мукаммал- қонунҳои Ҷумҳурии Тоҷикистон  «Дар бораи арзёбии  таъсиррасонӣ ба муҳити зист» ва «Дар бораи сайёҳии дохилӣ», инчунин  ворид намудани тағйиру иловаҳо ба Қонунҳои Ҷумҳурии Тоҷикистон  «Дар бораи милитсия», «Дар бораи  фаолияти оперативӣ-ҷустуҷӯӣ», «Дар бораи реклама», «Дар бораи ҳаракат дар роҳ», «Дар бораи  монополияҳои табиӣ»-ро муҳокима ва ҷонибдорӣ намуданд.

Раисони кумитаҳои Маҷлиси миллии Маҷлиси Олии Ҷумҳурии Тоҷикистон Озода Раҳмон, Давлатшоҳ Гулмаҳмадзода,  Фарҳод Раҳимӣ,  Муҳаммадюсуф  Имомзода ва Раҳмоналӣ Амирзода иброз доштанд,  ки қонунҳои мазкур бо мақсади такмили қонунгузории  Ҷумҳурии Тоҷикистон, мутобиқ намудани онҳо ба Конститутсияи Ҷумҳурии Тоҷикистон, таҳкими волоияти қонун ва рушди соҳаҳои  иқтисодию иҷтимоии кишвар ва тақвияти пояҳои давлатдорӣ таҳия гардидаанд.

Дар иҷлосияи ёздаҳуми Маҷлиси миллӣ ҳамзамон  номи баъзе аз маҳалҳои  аҳолинишини ноҳияи Ёвони вилояти Хатлон  иваз карда шуд.