Масоили рушди соҳаи сайёҳӣ дар мулоқот бо ҳамоҳангсози СММ дар Тоҷикистон ва Намояндаи доимии Агентии Ҷопон оид ба ҳамкориҳои байналмилалӣ баррасӣ шуданд

ДУШАНБЕ, 26.08.2017 /АМИТ «Ховар»/. Вобаста ба дастгирии рушди соҳаи сайёҳӣ ва амалӣ намудани чорабиниҳо дар ин самт, мулоқотҳои Раиси Кумитаи рушди сайёҳии назди Ҳукумати Ҷумҳурии Тоҷикистон Нуъмон Абдуғаффорзода бо ҳамоҳангсози Созмони Милали Муттаҳид дар Тоҷикистон хонум Пратибха Меҳта ва Намояндаи доимии Агентии Ҷопон оид ба ҳамкориҳои байналмилалӣ Хидеки Танабе доир гардиданд.

Зимни мулоқотҳо масъалаҳои тақвияти неруи касбии кормандони соҳаи сайёҳӣ, ташкили омўзишҳои соҳавӣ вобаста ба баланд бардоштани сатҳи хизматрасонӣ бо ҷалби коршиносони дохиливу хориҷӣ, сохтмони инфрасохтори сайёҳӣ ва ҷалби сармоя дар ин самт, муаррифӣ намудани имкониятҳои сайёҳии ҷумҳурӣ дар дохил ва хориҷи мамлакат, таҳияи хатсайрҳои нав ва муаррифии онҳо, ташкили чорабиниҳо ва намоишгоҳҳои сайёҳӣ ва дигар масъалаҳои рушди соҳа мавриди баррасӣ қарор дода шуданд.

Ҷонибҳо ба хулоса омаданд, ки дар самтҳои қайдгардида ҳамкориҳои судмандро ба роҳ монда, ба тақвияти рушди соҳаи сайёҳии ҷумҳурӣ ва муаррифии шоистаи он дар дохил ва хориҷи мамлакат бо истифода аз имтиёзҳо ва шароитҳои фароҳамовардаи Ҳукумати Ҷумҳурии Тоҷикистон тадбирҳои заруриро амалӣ менамоянд.