Дар Тоҷикистон беш аз 1 миллион тонна ангишт истихроҷ гардид, ки дар таърихи кишвар бесобиқа аст

     ДУШАНБЕ, 24.10.2017 /АМИТ «Ховар»/. Корхонаҳои истихроҷкунандаи ангишти кишвар аз оғози сол то имрӯз беш аз 1,3 миллион  тонна ангишт истихроҷ карданд. Аз Вазорати саноат ва технологияҳои нави Ҷумҳурии Тоҷикистон ба АМИТ «Ховар» иттилоъ доданд, ки ҳаҷми ангишти истихроҷгардида дар таърихи Тоҷикистон  нишондиҳандаи баландтарин маҳсуб меёбад. Гуфта мешавад, ки ин омор нисбат ба ҳамин давраи соли сипаригардида 267 ҳазор тонна зиёд аст. Дар ин дастовард саҳми корхонаҳои истихроҷкунандаи ангишт, назири кони «Фон-Яғноб» ( 617 ҳазор тонна), «Талко-Ресурс» (286 ҳазор тонна) ва Департаменти истихроҷи ангишти ҶДММ «Комбинати металлургии тоҷик» (223,3 ҳазор  тонна) назаррас  аст.

Ҳамаи ин комёбиҳо бо шарофати сиёсати хирадмандонаи  Асосгузори сулҳу вањдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастгирии ҳамарӯзаи Ҳукумати Ҷумҳурии Тоҷикистон ҷиҳати фароҳам овардани шароити мусоид  барои меҳнати самараноку фидокоронаи шабонарӯзии кормандони соҳа ба даст омадааст.

Манбаъ афзуд, ки кормандони соҳаи ангишт талаботи тамоми соҳаҳои иқтисодиёт ва иҷтимоиёти ҷумҳуриро ба ангишт таъмин намуда, азм доранд бо нишондиҳандаҳои баланди истеҳсолӣ ҷамъбаст намоянд.

Бояд тазаккур дод, ки имрӯз 230 корхонаи соҳаҳои саноат ва энергетика ангиштро ҳамчун сӯзишвории алтернативии ивазкунандаи гази табиӣ истифода мебаранд. Ин тадбир имконият фароҳам овард, ки вобастагии иқтисодиёти истеҳсолии ҷумҳурӣ аз воридоти гази табиӣ ва маҳсулоти нафтӣ  коҳиш ёбад.