Беш аз сеяки моддаҳои Конститутсияи Тоҷикистон ба инсон, ҳуқуқ ва озодиҳои ӯ бахшида шудаанд — ҳамоиш дар Суди конститутсионӣ

Ноябрь 2, 2017 15:28

ДУШАНБЕ, 02.11.2017 /АМИТ «Ховар»/. Нимаи аввали имрӯз дар толори Суди конститутсионии мамлакат ба муносибати Рӯзи Конститутсияи Ҷумҳурии Тоҷикистон, ки ҳамасола 6 ноябр ҷашн гирифта мешавад, бо иштироки олимон, мутахассисон, намояндагони мақомоти давлатӣ, донишҷӯён ва намояндагони ВАО таҳти унвони «Конститутсия ва рушди давлатдории миллӣ» ҳамоиш баргузор гардид.

Маҳкам Маҳмудзода, раиси Суди конститутсионии Ҷумҳурии Тоҷикистон зимни маърӯзаи худ дар рӯзҳои мураккаб ва вазъияти шадиди сиёсӣ-иҷтимоӣ қабул гардидани Конститутсияи Тоҷикистонро ба ёд оварда, зикр кард: «Баъд аз ба даст овардани истиқлолияти давлатӣ яке аз вазифаҳои муҳим қабули санади ҳуқуқӣ буд, ки бояд роҳи ояндаи давлату миллатро муайян мекард.

Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон дар  Иҷлосияи таърихии XVI Шӯрои Олии Ҷумҳурии Тоҷикистон вобаста ба ин мавзӯъ изҳор карданд, ки моро зарур аст санадҳои ҳуқуқии худро таҳия ва қабул намуда, онҳоро бо меъёрҳои байналмилалӣ мутобиқ намоем ва ба ин васила, барои бунёди давлати демократӣ, дунявӣ ва ҳуқуқбунёд заминаи ҳуқуқӣ гузорем», — гуфт М.Маҳмудзода.

Ҳамин тавр, идеяи қабул намудани Конститутсия аз Иҷлосияи таърихии Шӯрои Олӣ дар шаҳри Хуҷанд сарчашма гирифт ва барои таҳияи лоиҳаи Конститутсия комиссияи босалоҳият ташкил карда шуд.

Комиссияи мазкур давоми шаш моҳ ду лоиҳаи Конститутсия- яке бо идоракунии парламентӣ ва лоиҳаи дигар бо идоракунии президентиро таҳия ва пешниҳод кард.

М. Маҳмудзода дар идома зикр кард, ки «ба раъйпурсии умумихалқӣ лоиҳаи Конститутсия бо идоракунии президентӣ гузошта шуд ва 6 ноябри соли 1994 бо раъйи зиёда аз 87 фоизи интихобкунандагон  бори аввал дар таърихи давлатдории тоҷикон ба тариқи раъйпурсӣ Конститутсия қабул карда шуд. Хусусияти муҳими Конститутсияи қабулгардида ин буд, ки он волоияти қонунро дар Ҷумҳурии Тоҷикистон эълон кард».

Содиқ Шоназаров, мушовири калони бахши Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ ба ҳозирон иттилоъ дод, ки беш аз сеяки моддаҳои Конститутсияи Тоҷикистон ба инсон, ҳуқуқ ва озодиҳои ӯ бахшида шудаанд.

«Дар асоси Конститутсия зиёда аз 1000 қонунҳо, аз ҷумла, 17 қонуни конститутсионӣ, 343 қонунҳои соҳавӣ, 22 кодексҳо қабул гардидаанд, ки бешак, дар рушди давлатдории миллӣ нақши муҳим бозидаанд», — зикр кард С.Шоназаров.

Дар ҳамоиш донишҷӯён оид ба дигар хусусиятҳои Конститутсияи мамлакат ба мутахассисон муроҷиат карда, аз коршиносони соҳа ба саволҳои худ ҷавобҳои қаноаткунанда гирифтанд.

Ноябрь 2, 2017 15:28

Хабарҳои дигари ин бахш

7 август дар вазоратҳои корҳои дохилӣ, адлия, Суди Олӣ, Хадамоти гумрук ва Палатаи ҳисоб нишасти матбуотӣ баргузор мегардад
Ба Тоҷикистон ба маблағи беш аз 143 миллион доллар гандум ворид карда шудааст
Ташкилоти молиявию қарзии Хатлон ба иқтисодиёт беш аз 2 миллиард сомонӣ қарзҳои бонкӣ ҷудо намудаанд
Ба Тоҷикистон ба маблағи зиёда аз 443 миллион доллар маҳсулоти нафтӣ ворид карда шудааст
Имрӯз дар Тоҷикистон ҳаво камабри бебориш мешавад
Имрӯз дар вазоратҳои рушди иқтисод ва савдо, саноат ва технологияҳои нав, Кумитаи давлатии сармоягузорӣ ва идораи амволи давлатӣ ва Агентии омор нишасти матбуотӣ баргузор мегардад
ОБОДОНӢ ДАР ДЕҲОТ. Дар деҳаи Роҷи Панҷакент варзишгоҳи мактабӣ ба истифода дода шуд
3010 нафар сайёҳони хориҷӣ манзараҳои нотакрори Ховалингро тамошо намуданд
Дар Хатлон 165 бинои нави муассисаҳои таълимӣ бунёд карда мешавад
6 август дар вазоратҳои рушди иқтисод ва савдо, саноат ва технологияҳои нав, Кумитаи давлатии сармоягузорӣ ва идораи амволи давлатӣ ва Агентии омор нишасти матбуотӣ баргузор мегардад
Имрӯз дар Тоҷикистон гармии ҳаво ба 37 дараҷа мерасад
ТАҚВИМИ АМИТ «ХОВАР»: имрӯз 5 август, сешанбе, 217-умин рӯзи соли 2025 аст