Г. Маҳмудов: «Чорумин ҳамоиши сарварони китобхонаҳои миллии кишварҳои узви СҲИ дар таърихи соҳибистиқлолӣ аввалин нишасти сатҳи баланди китобхонавист»
ДУШАНБЕ, 27.11.2017. /АМИТ «Ховар»/. Тавре хабар додем, имрӯз дар шаҳри Душанбе чорумин нишасти сарварони китобхонаҳои миллии кишварҳои аъзои Созмони ҳамкориҳои иқтисодӣ (СҲИ) оғоз ёфт. Хабарнигори АМИТ «Ховар», ки дар ҷараёни нишасти мазкур иштирок дошт, атрофи барномаҳои ҳамоиш бо муовини директори Китобхонаи миллии Тоҷикистон Гадобек МАҲМУДОВ суҳбат намуд.
АМИТ «Ховар»: Сараввал мехостам атрофи нишасти мазкур ва ҳадафҳои он сухан мегуфтед.
Гадобек Маҳмудов: Ниҳодҳои гуногуни кишварҳои ҳамзабону ҳамсоя ва ба ҳамдигар дорои робитаҳои хуби таърихӣ дар сатҳҳои гуногун ҳамкории илмӣ – фарҳангиро ба роҳ мондаанд, ки дар шинохту таҳкими ҳамдигарӣ мусоидат менамояд. Аз ҷумлаи ин гуна ҳамкорӣ нишасти сарварони китобхонаҳои миллии кишварҳои аъзои Созмони хамкориҳои иқтисодӣ (СҲИ) мебошад. Баъд аз таваққуфи 7-сола нишасти мазкур бо талошҳои намояндагии Тоҷикистон дар ин созмон ва ташаббуси Китобхонаи миллии Тоҷикистон баргузор гардид, ки аз таваҷҷуҳу ғамхории Сарвари давлати тоҷикон ва фарҳангдӯстии ин миллат дарак медиҳад.
Бояд гуфт, ки чорумин нишасти сарварони китобхонаҳои миллии кишварҳои узви Созмони ҳамкории иқтисодӣ дар ҳоле баргузор мешавад, ки Тоҷикистон узви ин Созмон мебошад. Ҳамоиши мазкур бо ташаббуси Ҳукумати кишвар аз ҷониби Китобхонаи миллӣ роҳандозӣ гардида, дар таърихи соҳибистиқлолии кишвар аввалин нишасти сатҳи баланди китобхонавӣ ба шумор меравад.
АМИТ «Ховар»: Баргузории чунин як нишаст ба кишвари мо чӣ манфиат хоҳад овард?
Гадобек Маҳмудов: Аз замони Шӯравӣ то кунун ин гуна ҳамоиши сатҳи баланди фарҳангию китобхонавӣ дар кишвар бори аввал аст. Албатта, баргузории он бо чунин ҳайати пурнуфуз самари соҳибистиқлолӣ дар кишвари мо маҳсуб шуда, муаррифи соҳаи китоби тоҷикону Китобхонаи миллии кишвар дар ҷаҳон мебошад. Чорумин нишасти сарварони китобхонаҳои миллии кишварҳои узви Созмони ҳамкориҳои иқтисодӣ ба имзо расидани ёддоштҳои тафоҳум байни китобхонаҳои миллии кишварҳои узв ва ба роҳ мондани мубодилаи иттилоту дастрасӣ ба китоб байни китобхонаи ин кишварҳо дар назар дошта шудааст.
Ёдовар мешавем, ки баргузории нишасти сарварони китобхонаҳои миллии кишварҳои узви Созмони ҳамкориҳои иқтисодӣ, ки ҷумҳуриҳои Тоҷикистон Афғонистон, Озарбойҷон, Қазоқистон, Қирғизистон, Покистон, Туркия, Ӯзбекистон, Эрон ва Туркманистон узви он мебошанд, фурсати хубе барои масъалагузорӣ намудани тавсеа ва таҳкими ҳамкорӣ ба шумор меравад. Аз ҷумла, пас аз нишасти мазкур ҷиҳати таҳкими ҳамкории судманд байни китобхонаҳои миллии мазкур таҳияи лоиҳаи феҳристи Китобхонаи миллии электронии давлатҳои СҲИ, таҳияи феҳристи ягонаи тамоми дастхатҳои нодири китобхонаҳои миллии кишварҳои узв ва баргузории конфронсҳои илмӣ-амалӣ оид ба масъалаҳои муҳими китобдории ҷаҳон, тасъсис ва интишори маҷаллаи тахассусӣ дар заминаи мубодилаи таҷрибаи кишварҳои аъзои СҲИ дар назар дошта шудааст.
АМИТ «Ховар»: Китобхонаи миллии Тоҷикистон то ин муддат бо кадом китобхонаҳои дунё робита дорад?
Гадобек Маҳмудов: Бо ба даст овардани Истиқлолияти давлатӣ ҳамкорӣ бо дигар давлатҳо рушд ёфт. Ҳоло Китобхонаи миллӣ бо 28 китобхонаи кишварҳои хориҷӣ робитаи мустаҳкам дошта, барои ҳамкорӣ ёддошту тафоҳумнома ба тасвиб расонидааст. Алалхусус робита бо китобхонаҳои Ҷумҳурии Исломии Покистон ва Франсия хеле қавӣ мебошад. Моҳи сентябри соли равон бо кӯшишу талошҳои Сафорати Тоҷикистон дар Покистон ба Китобхонаи миллӣ бештар аз 306 адад нусхаи электронии китобҳои дастнавис ворид гардид. Миёни ин нусхаҳо чанд китоби нодир, аз ҷумла, «Девон»-и Нуриддин Воизи Шопурӣ, «Таърихи Шокирхонӣ», «Изҳори адвия ва тасофири ҷонварон», «Таърихи ҳашт биҳишт» мавҷуданд, ки барои пажӯҳишгарону хонандагон хеле муфид арзёбӣ мешаванд. Аз ҷониби Китобхонаи миллии Франсия ва дигар китобхонаҳо солҳои охир беш аз 350 нусха китобу таҳқиқоти арзишманди илмӣ ворид шудаанд.
АМИТ «Ховар»: Итминони комил дорем, ки ин нишаст барои тақвияти бештари ҳамкорӣ бо давлатҳои узви СҲИ заминаи хуб фароҳам меоварад. Ташаккур барои суҳбат.
Гадобек Маҳмудов: Саломат бошед!
Зарангези ЛАТИФ
ИМРӮЗ-РӮЗИ ИТТИФОҚҲОИ КАСАБА. Имсол Иттифоқҳои касабаи Тоҷикистон раёсати Шурои иттифоқҳои касабаи Осиёи Марказиро ба уҳда дорад
«ХОНАНДАИ БЕҲТАРИНИ АСАРҲОИ ПЕШВОИ МИЛЛАТ». Ҳадафи озмун аз густариши эҳтиром нисбат ба арзишҳо, суннат ва адабу русуми миллӣ иборат аст
Валид ибни Абдураҳмон ар-Решайдон: «Робитаҳои дуҷонибаи Тоҷикистон ва Арабистони Саудӣ густаришу равнақи бештар меёбанд»
Зебо Баротова: «Мехоҳам бо маблағи гранти президентӣ ба занони бешуғл ҳунар омӯзонаму онҳоро ба кор ҷалб намоям»
ИМРӮЗ-РӮЗИ БАЙНАЛМИЛАЛИИ СУЛҲ. Таҷрибаи сулҳи тоҷикон дар ҷаҳони муосир мавриди омӯзиши васеъ қарор дорад
СОЛИ МАЪРИФАТИ ҲУҚУҚӢ. Агар волидон то 3 моҳ барои кӯдак шаҳодатномаи таваллуд нагиранд, ҷарима пардохт менамоянд
Сафири Амрико дар Тоҷикистон Мануэл Микаллер: «Давоми панҷ соли охир Тоҷикистон дар роҳи рушди иҷтимоиву иқтисодӣ устуворӣ ва азми пойдор нишон дод»
Хуршед Файзуллозода: «Ҳадафи Агентии инноватсия ва технологияҳои рақамӣ вусъат бахшидани раванди амалӣ намудани «ҳукумати электронӣ» аст»
Мавзуна Чориева: «Аз варзишгарони тоҷик умеди зиёд дорем, ки дар Бозиҳои олимпии Париж-2024 ба дастовардҳои назаррас ноил мегарданд»
ТОҶИКИСТОНУ ЧИН ШАРИКОНИ ҲАМАҶОНИБАИ СТРАТЕГӢ МЕБОШАНД. Нашри мусоҳибаи Президенти Ҷумҳурии Тоҷикистон муҳтарам Эмомалӣ Раҳмон дар ВАО-и расмии Чин
«МАН БА МАРДУМИ ТОҶИК ҲАВАС МЕБАРАМ, КИ ДАР ЧУНИН ТАБИАТИ ЗЕБО УМР БА САР МЕБАРАНД…». Таассуроти меҳмонон ва иштирокдорони Конфронси сеюми оби Душанбе аз тамошои манзараҳои Тоҷикистон
ИҚДОМҲОИ ПРЕЗИДЕНТИ ТОҶИКИСТОН ҶОМЕАИ ҶАҲОНРО БА ҲАМ ОВАРД! Таассуроти меҳмонон ва иштирокдорони Конфронси сеюми оби Душанбе аз тамошои дараи Ромит
