Парлумон Созишномаи грантӣ оид ба беҳтар гардонидани низоми обтаъминкунии шаҳри Хуҷандро ба тасвиб расонид

Декабрь 13, 2017 16:33

ДУШАНБЕ, 13.12.2017 /АМИТ «Ховар»/. Вакилони Маҷлиси намояндагони Маҷлиси Олии Ҷумҳурии Тоҷикистон дар иҷлосияи чоруми Маҷлиси намояндагони Маҷлиси Олии Ҷумҳурии Тоҷикистон, даъвати панҷум, ки имрӯз таҳти раёсати Раиси Маҷлиси намояндагон Шукурҷон Зуҳуров баргузор шуд, Созишномаи грантӣ байни Ҷумҳурии Тоҷикистон, Корхонаи воҳиди давлатии коммуналии «Хуҷандводоканал» ва Бонки аврупоии таҷдид ва рушд оид ба «Барномаи беҳтаргардонии низоми обтаъминкунии шаҳри Хуҷанд, марҳилаи 3»-ро ба тасвиб расониданд. Дар ин бора ба АМИТ «Ховар» аз хадамоти матбуоти Маҷлиси намояндагони Маҷлиси Олии Ҷумҳурии Тоҷикистон хабар доданд.

Созишномаи мазкурро ба вакилони  мардумӣ  муовини якуми Вазири молияи Ҷумҳурии Тоҷикистон Ҷамшед Каримзода ва вакили мардумӣ Мирзодавлат Сабурзода баррасӣ намуда, иброз доштанд, ки ҳадафи асосии лоиҳаи мазкур- ин баланд бардоштани сатҳи зиндагии аҳолӣ ва мустаҳкам намудани инфрасохтори муҳим ҷиҳати таъмини аҳолӣ бо оби нӯшокӣ ва муайян намудани миқдори оби нӯшокии интиқолгардида мебошад.

Лоиҳаи мазкур барои фаъолияти пурраи иншооти партовобтозакунии шаҳр, беҳтар намудани  таъминоти оби нӯшокии шаҳраки «Обшорон»-и ноҳияи Бобоҷон Ғафуров, таъмир ва таҷҳизонидани ташхисгоҳҳои оби нӯшокӣ ва партовоб, инчунин  ивази қубурҳои обгузар ва хатҳои партовоб равона карда мешавад.

Лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи зотпарварӣ»-ро вакили мардумӣ  Бибидавлат Авзалшоева ва  муовини Вазири кишоварзии Ҷумҳурии Тоҷикистон Нусратулло Мӯсоев баррасӣ намуда, изҳор доштанд, ки лоиҳаи қонуни мазкур  бо тартиби ҳуқуқи ташаббуси қонунгузорӣ аз тарафи вакилони Маҷлиси намояндагони Маҷлиси Олии Ҷумҳурии Тоҷикистон Р. Латифзода, О.Сафаров, М.Ахмедов, Б. Авзалшоева ва З. Сафаров пешниҳод шудааст.

Тағйиру иловаҳо бо дарназардошти мутобиқгардонии Қонуни зикргардида ба қонунгузории Ҷумҳурии Тоҷикистон, бартараф намудани мухолифату норасоиҳои ҷойдошта, мушаххасу саҳеҳ гардонидани истилоҳу ибораҳо таҳия шудааст.

Вобаста ба саҳеҳ гардонидани доираи амали Қонун дар пешбурди корҳои зотпарварӣ дар матни Қонун иваз намудани калимаҳои «ҳайвонот», «ҳайвони», «ҳайвонҳои» ва «ҳайвон» ба калимаҳои «чорвои кишоварзӣ», «чорвои зотии кишоварзӣ» пешбинӣ шудааст.

Масъалаи ниҳоии рӯзнома-лоиҳаи Қонуни Ҷумҳурии Тоҷикистон «Дар бораи ғалла ва маҳсулоти коркарди он»-ро ба вакилони Маҷлиси намояндагон вакил Мирзоанвар Ахмедов ва Вазири саноат ва технологияҳои нави Ҷумҳурии Тоҷикистон Шавкат Бобозода баррасӣ намуда, зикр намуданд, ки лоиҳаи Қонуни мазкур дар қиёс ба қонуни амалкунандаи Ҷумҳурии Тоҷикистон «Дар бораи ғалла» фарқиятҳои зеринро дар бар мегирад:

  1. Дар лоиҳаи Қонун заминаи ҳуқуқии фаъолият дар соҳаи муомилоти ғалла ва маҳсулоти коркарди он (боби 2) ифода ёфтааст, ки раванди истеҳсол, коркард, нигоҳдорӣ, тайёркунӣ, фурӯш, воридоту содирот, истифодаи партовҳои ғалла ва маҳсулоти коркарди онро танзим менамояд.
  2. Асосҳои ҳуқуқии таъйиноти захираҳои давлатии ғалла бо дарназардошти захираҳои маҳсулоти коркарди он дар лоиҳаи Қонун ҳамчун боби алоҳида пешбинӣ шудааст. Дар Қонуни амалкунанда масъалаи мазкур танҳо дар 1 модда (моддаи 10) ифода гардидааст.
  3. Ҳамчунин принсипҳои ташкили муомилоти ғалла ва маҳсулоти коркарди он, ҳуқуқу уҳдадориҳои субъектҳои хоҷагидорӣ, бақайдгирии миқдору сифати ғалла, принсипу усулҳои танзими давлатӣ, ваколатҳои мақоми ваколатдори давлатӣ дар соҳаи истеҳсол, коркард, нигоҳдорӣ, тозакунӣ, хушконидан, безараргардонӣ, интиқолу истифодаи партовҳои ғалла ва маҳсулоти коркарди он, ваколатҳои мақомоти маҳаллии ҳокимияти давлатӣ, шаклҳои дастгирии давлатӣ ва самтҳои он, талабот нисбат ба бехатарии ғалла ва маҳсулоти коркарди он дар моддаҳои алоҳида мушаххас ифода ёфтаанд, ки дар Қонуни амалкунанда пешбинӣ нагардидаанд.

Лоиҳаи Қонун аз 6 боб ва 36 модда иборат мебошад. Дар боби 1 муқаррароти умумӣ (моддаҳои 1 — 9) мафҳум, принсипҳои ташкили муомилоти ғалла ва маҳсулоти коркарди он, ҳуқуқу уҳдадориҳои субъектҳои хоҷагидорӣ, бақайдгирии миқдору сифати ғалла пешбинӣ гардидаанд.

Дар фарҷоми иҷлосия аз рӯи ҳамаи масъалаҳои муҳокимашуда қарорҳои дахлдор қабул карда шуданд.

Декабрь 13, 2017 16:33

Хабарҳои дигари ин бахш

Дар Маҷлиси намояндагон бахшида ба Рӯзи Ваҳдати миллӣ ҳамоиши идона доир гардид
Ҳайати Маҷлиси намояндагон дар Форуми 20-уми СММ оид ба идоракунии интернет иштирок дорад
Ваҳдати миллӣ арзишмандтарин бозёфт дар таърихи навини давлатдории миллати тоҷик мебошад
Барно Саидвализода: «Ваҳдати миллӣ – ин неъмати бузургу кафолати зиндагии шоистаро пойдор нигоҳ бидорем»
Ҷаласаи навбатии иҷлосияи якуми Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор шуд
Дар Маҷлиси намояндагон масъалаи обу иқлим ва ҳифзи пиряхҳо баррасӣ шуд
Ваҳдати миллӣ ва рушди парламентаризм дар Тоҷикистон яке аз дастовардҳои муҳими даврони соҳибистиқлолӣ ба шумор меравад
ПЕШВОИ ВАҲДАТОФАР. Ва ё ваҳдате, ки бо шарофати он давлатдории миллии тоҷикон дубора эҳё гардид
Густариши робитаҳои байнипарлумонии Тоҷикистон ва Британияи Кабир баррасӣ гардид
Дар Лондон мулоқоти ҳайатҳои парламентии Тоҷикистон ва Британияи Кабир баргузор мешавад
Имрӯз ҷаласаи навбатии иҷлосияи якуми Маҷлиси намояндагони Маҷлиси Олӣ, даъвати ҳафтум баргузор шуд
Ҷаласаи навбатии иҷлосияи якуми Маҷлиси намояндагони Маҷлиси Олӣ, даъвати ҳафтум баргузор гардид