Ҳунармандони Бадахшон аз эълони Соли рушди сайёҳӣ ва ҳунарҳои мардумӣ хеле хушҳоланд

Декабрь 25, 2017 15:56

ХОРУҒ, 25.12.2018  /АМИТ «Ховар»/. Дар ҷамоати деҳоти Тусиёни ноҳияи Роштқалъа бо дастгирии Раёсати ҷавонон ва варзиши Вилояти Мухтори Кӯҳистони Бадахшон коргоҳи хурди бофандагию ресандагӣ кушода шуд. Дар рӯзи аввали корӣ, ки ба рӯзи ирсоли Паёми Президенти Тоҷикистон рост омад, ҳунармандони коргоҳ Паёми  Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олиро тамошо карданд. Аз он ки дар Паёми имсолаи худ Сарвари давлат ба  бахши сайёҳӣ ва ҳунарҳои мардумӣ дар кишвар аҳамияти хосса зоҳир карда, ба ҳукумати мамлакат дустур дод, ки бо мақсади рушди ҳунарҳои мардумӣ ба соҳибкорону ҳунармандон аз Фонди дастгирии соҳибкорӣ  қарзҳои бештари имтиёзнок ҷудо намоянд, ҳунармандон хеле хушҳол гардиданд. Илова бар ин дар Паём омадааст, ки  «бо мақсади ҳавасмандгардонии аҳолӣ ҷиҳати истеҳсоли молҳои ниёзи мардум дар хона ва рушди ҳунарҳои мардумӣ аз 1 январи соли 2018 фурӯши чунин молу мавод аз пардохти ҳамаи намудҳои андоз озод карда шавад».

Муовини сардори Раёсати ҷавонон ва варзиши вилоят  Сураҷ Чоршанбиев гуфт, ки Соли рушди сайёҳӣ ва ҳунарҳои мардумӣ эълон намудани соли 2018-ро ҳам кормандони соҳаи сайёҳӣ ва ҳам ҳунармандони мардумӣ бо хурсандӣ истиқбол гирифтанд. Аслан ин ду мафҳум бо ҳам робитаи қавӣ доранд ва дар сурати баробар тараққӣ додани ин ду соҳа ҳам ҷавонони зиёд соҳиби ҷои кор мешаванд ва ҳам буҷаи маҳаллӣ ғанитар мегардад.

Бо дастгирии бевоситаи Сарвари давлат  дар шаҳри Хоруғ ва ноҳияҳои вилоят марказҳои муосири хаизматрасонӣ кушода шуданд ва дар бештари ин марказҳо барои ҳунармандони мардумӣ утоқҳо ҷудо карда шудаанд. Ҳунармандон  акнун имкон пайдо намуданд, ки маҳсулоти дастии худро ба сайёҳони дохилию хориҷӣ пешниҳод намоянд.

Ин коргоҳи хурде, ки дар ҷамоати Тусиёни ноҳияи Роштқалъа ба фаъолият оғоз кард, дар марҳилаи аввал аз ҷониби Раёсати ҷавонон дастгирӣ карда мешавад. Ҳоло ин коргоҳро Раёсати мазкур бо ашёи хом таъмин мекунад ва дар оянда тибқи шартнома коргоҳи бофандагию ресандагиро худи сокинони деҳот таъмин мекунанд. Раиси ҷамоати деҳоти Тусиён Манзура Раҷаббекова гуфт, ки аксарияти деҳотиён ба парвариши чорво машғуланд ва дар гузашта намедонистанд, ки пашми бузу гӯсфандонашонро чӣ гуна истифода баранд.  Ҳоло барои онҳо чунин имконият фароҳам оварда шуд.

Ба гуфтаи Сураҷ Чоршанбиев, дар оянда онҳо ният доранд, ки чунин коргоҳҳои хурди бофандагию ресандагиро дар деҳоти дигари вилоят ба роҳ андохта, дар пайдо кардани мизоҷон ба ҳунармандони мардумӣ кумаки худро расонанд.

Декабрь 25, 2017 15:56

Хабарҳои дигари ин бахш

Донишкадаи умумирусиягии кинематографияи ба номи Сергей Герасимови шаҳри Москва қабули довталабонро эълон намуд
«Нурворизм» ва «Танворизм» -«Ду равияи як рассом». Дар Осорхонаи миллӣ намоиши асарҳои рассом Зокир Собиров ифтитоҳ гардид
Коллеҷи хореографӣ ба номи Малика Собирова дар соли нави хониш ба истифода дода мешавад
Дар Қатар инъикоси мавзеъҳои сайёҳии Тоҷикистон дар шабакаи иттилоотии «Ал-Ҷазира» баррасӣ шуд
«ТОҶИКОНА МЕПӮШЕМ». Ҳадафи ин иқдом тарғиби либоси миллӣ ва ҷалби тарроҳон ба муосиргардонии он мебошад
«САҲМИ ИБНИ СИНО ДАР ТАШАККУЛИ ТИББИ ҚАДИМ ВА МУОСИР: ОСОРИ ИЛМӢ, ТАҶРИБА ВА НАЗАРИЯ». Таҳти ин унвон дар Русия озмуни мақолаи беҳтарин эълон гардид
Филми «Дар талоши ҳақиқат» аввалин маротиба дар синамоҷашнвораи «Дебют»-и Амрико иштирок мекунад
Агентии миллии иттилоотии Тоҷикистон «Ховар» ҳамкориро бо рӯзномаи «Жэнмин Жибао»-и Чин тақвият мебахшад
Байни Агентии миллии иттилоотии Тоҷикистон «Ховар» ва Медиакорпоратсияи «CMG»-и Чин Ёддошти тафоҳуми ҳамкорӣ ба имзо расид
«ҲУНАР ОМӮЗ…». Дар ин озмун беҳтарин даврии чакан ба намоиш гузошта шуд
САЙЁҲӢ ДАР ТОҶИКИСТОН СОҲАИ ОЯНДАДОР АСТ. Мулоҳизаҳои ректори Донишгоҳи байналмилалии сайёҳӣ ва соҳибкорӣ Убайдулло Асрорзода
Меҳмонон аз Ҷумҳурии Мардумии Чин Осорхонаи миллии Тоҷикистонро тамошо карданд