БА ДУШАНБЕ АВТОБУСҲОИ ДУОШЁНА ВОРИД КАРДА МЕШАВАНД. Маркази хизматрасонии нақлиётӣ дар соҳаи сайёҳӣ ба фаъолият оғоз хоҳад кард

ДУШАНБЕ, 16.02.2018/АМИТ «Ховар»/. Интизор меравад, ки дар ояндаи наздик аз ҷониби Кумитаи рушди сайёҳии назди Ҳукумати Ҷумҳурии Тоҷикистон якҷо бо бахши хусусӣ Маркази хизматрасонии нақлиётӣ дар соҳаи сайёҳӣ бо фарогирии воридоти автобусҳои дуошёна, якошёна ва дигар навъҳои мошинҳо таъсис дода шавад.

Дар ин бора имрӯз раиси Кумитаи рушди сайёҳӣ Нуъмон Абдуғаффорзода зимни нишасти матбуотӣ ба хабарнигорон иброз намуд.

Ба иттилои номбурда, дар айни ҳол ҳамзамон лоиҳаҳои бунёди меҳмонхонаи “Хонаи шикорчиён” дар ноҳияи Ховалинг, осоишгоҳ-табобатгоҳи муосир дар шаҳри Норак, комплекси сайёҳӣ дар ноҳияи Шаҳристон ва шаҳри Ваҳдат, иншооти маишӣ ва хизматрасонӣ ба сайёҳон дар мавзеи Себистони ноҳияи Данғара, инфрасохтори сарироҳӣ, аз ҷумла, ташнобҳою меҳмонхонаҳо мавриди корбарии мутахассисон қарор доранд.

Таъкид гардид, ки бо мақсади боз ҳам беҳтар намудани хизматрасонии таксӣ ба меҳмонону сайёҳони дохилию хориҷӣ дар бинои ҶСК “Фурудгоҳи байналмилалии Душанбе” нуқтаи хизматрасонии таксии ҶДММ “Азиян Экспресс” ба таври муосир бунёд ва ба фаъолият шурӯъ намуда, чунин нуқта аз ҷониби ҶДММ “Рахш таксӣ” низ ба роҳ монда шуд.

Тавре Нуъмон Абдуғаффорзода иброз намуд, Кумита ҳарчанд ки навтаъсис аст, вале барои рушди устувори соҳаи сайёҳӣ ва ҷалби таваҷҷуҳи ҷомеа ба имконият ва захираҳои сайёҳии Тоҷикистон, ҳавасманд гардонидани субъектҳои хоҷагидори соҳаи сайёҳӣ ва омодасозии мутахассисони соҳа як қатор корҳоро ба анҷом расонида, барои амалӣ кардани нақшаҳои минбаъда пайваста  кӯшиш ба харҷ медиҳад.

Аз ҷумла, тибқи Нақшаи чорабиниҳои Соли рушди сайёҳӣ ва ҳунарҳои мардумӣ дар ҳар як шаҳру ноҳияҳо марказҳои хизматрасонии сайёҳон ва на кам аз 2 ширкати сайёҳӣ таъсис дода мешаванд. Татбиқи лоиҳаи “Минтақаҳои Тоҷикистон” оғоз гардида, сомонаи интернетии сайёҳии тамоми шаҳру ноҳияҳои ҷумҳурӣ омода карда мешаванд. Айни замон сомонаҳои шаҳру ноҳияҳои Турсунзода, Ҳисор ва Шаҳринав омода карда шудаанд.

Дар партави нуктаҳои Паёми Пешвои миллат дар ин сол ҷаласаи навбатии Шўрои ИДМ ва СҲИ оид ба сайёҳӣ, Форуми байналмилалии сайёҳӣ ва бори нахуст Намоишгоҳи байналмилалии сайёҳӣ таҳти унвони “Тоҷикистон — сарзамини сайёҳӣ” бо ҷалби ширкатҳои сайёҳии ватанию хориҷӣ ва Созмони умумиҷаҳонии сайёҳӣ, Симпозиум ва Намоишгоҳи сайёҳӣ таҳти унвони “Наврўз мероси фарҳангии сайёҳӣ”, фестивалҳои фарҳангиву сайёҳии “Марҳамат ба Хатлон!”, “Суғди Бостон”, “Марҳамат ба водии Рашт!”, “Боми ҷаҳон”, “Таомҳои миллӣ”, иштироки мутахассисони Кумита ва ширкатҳои сайёҳӣ дар як қатор намоишгоҳҳои байналмилалии сайёҳӣ ва дигар чорабиниҳо ба нақша гирифта шудаанд.

Инчунин як қатор озмунҳо дар бахши сайёҳӣ баргузор карда мешаванд. Аз ҷониби Кумита дар ҳамкорӣ бо шарикони рушд вобаста ба таҳияи замимаҳои мобилӣ оид ба имкониятҳои сайёҳии Тоҷикистон дар шабакаи интернет, аз ҷумла, ба низоми интернетии Google, рушди тиҷоратикунонии соҳаи ҳунармандӣ ва таҳияи маҳсулоти сайёҳӣ озмун эълон карда шудааст.

Дар ҳамкорӣ бо бахши хусусӣ масъалаҳои истифодаи технологияҳои муосири коммуникатсионӣ дар соҳаи сайёҳӣ, аз ҷумла, роҳнамои онлайн, харитаҳои электронии сайёҳӣ, маълумот оид ба мавзеъҳои сайёҳӣ ва хизматрасонии ширкатҳои сайёҳӣ, меҳмонхонаву осоишгоҳҳо, тарабхонаҳо ва дигар самтҳои муосири хизматрасонӣ ба сайёҳон роҳандозӣ мешаванд.