МУХЛИСОНИ ТОҶИКРО БА ЧЕМПИОНАТИ ҶАҲОН ОИД БА ФУТБОЛ МЕБАРАНД! ФФТ ва «Сомон Эйр» дар сурати зарурат парвозҳои иловагӣ ташкил мекунанд

ДУШАНБЕ, 15.02.2018 /АМИТ «Ховар»/. Федератсияи  футболи Тоҷикистон бо ширкати ҳавопаймоии «Сомон Эйр» дар сурати пеш омадани зарурат барои мухлисони футболи тоҷик ҷиҳати тамошои бозиҳои Чемпионати ҷаҳон-2018 оид ба футбол, ки дар Россия аз 14 июн то 15 июли соли равон баргузор мегарданд, парвозҳои иловагӣ бо тахфиф ташкил мекунанд.

Дар ин бора дирӯз дар ҷараёни ба имзо расонидани Шартнома дар бораи ҳамкории байни Федератсияи футболи Тоҷикистон (ФФТ) ва ширкати ҳавопаймоии «Сомон Эйр» барои соли 2018 иттилоъ дода шуд.

Тавре аз хадамоти матбуоти Федератсияи футболи Тоҷикистон хабар доданд, шартномаи мазкурро муовини раиси Федератсияи футболи Тоҷикистон Дилшод Ҷӯраев ва директори тиҷоратии ширкати ҳавопаймоии «Сомон Эйр» Абдулқосим Валиев ба имзо расониданд.