Вазорати саноат ва технологияҳои нав: Гардиши мол миёни Тоҷикистон ва Ӯзбекистон 126 млн долларро ташкил дод

ДУШАНБЕ, 13.02.2018 /АМИТ «Ховар»/. Ҳоло гурӯҳи корӣ миёни ду давлати бо ҳам дӯсту бародар- Тоҷикистон ва Ӯзбекистон дар самти баррасии муносибатҳои саноатӣ кор бурда истодааст. Дар доираи ин корҳо мо ба шарикони худ рӯйхати молу маҳсулоти содироткунандаро пешниҳод намудем. Дар ин бора Вазири саноат ва технологияҳои нави Ҷумҳурии Тоҷикистон Шавкат Бобозода имрӯз зимни нишасти матбуотии ин ниҳод ба хабарнигорон иттилоъ дод.

Бино ба гуфтаи вазир, рӯйхати тартибдодаи Вазорат асосан алюминий, пахта, меваҳои тару хушк, газворҳои нассоҷӣ, қисман пилла, маҳсулоти бофандагӣ, қолинбофӣ, ҷӯроббофӣ, шаробҳо, семент ва ғайраро дар бар мегирад.

Шавкат Бобозода гуфт, ки соли сипаригардида ҳаҷми содироти маҳсулоти Тоҷикистон ба Ӯзбекистон тақрибан бо воридоти маҳсулоти Ӯзбекистон ба Тоҷикистон баробар буд. Тибқи маълумоти оморӣ, соли 2017 гардиши молу маҳсулоти дуҷониба миёни Тоҷикистон ва Ӯзбекистон 82 фисад боло рафта, 126 млн. доллари ИМА-ро ташкил дод.

Зикр карда шуд, ки дар сохтори гардиши молу маҳсулот миёни ду давлат 69 млн. доллар ба воридоти маҳсулоти Ӯзбекистон ба Тоҷикистон ва 57 млн доллар ба  содироти маҳсулоти Тоҷикистон ба Ӯзбекистон рост меояд.