Маркази омӯзиши минтақавӣ оид ба пешгирӣ намудани терроризм бо истифода аз силоҳи қатли ом ва назорати содиротӣ мавриди истифода қарор гирифт

ДУШАНБЕ, 20.03.2018 /АМИТ «Ховар»/. Дар арафаи Наврӯзи байналмилалӣ дар назди Агентии амнияти ядроӣ ва радиатсионии Академияи илмҳои Ҷумҳурии Тоҷикистон Маркази омӯзиши минтақавӣ оид ба пешгирӣ намудани терроризм бо истифода аз силоҳи қатли ом ва назорати содиротӣ, ки барои давлатҳои Осиёи Марказӣ, Қафқоз ва Афғонистон пешбинӣ шудааст, мавриди истифода қарор гирифт.

Дар маросими расмии ифтитоҳи марказ намояндагони Ҳукумати Ҷумҳурии Тоҷикистон, вазорату идораҳои марбута ва корпусҳои дипломатии муқими Тоҷикистон ва созмонҳои байналмилалӣ иштирок доштанд.

Президенти Академияи  илмҳои Ҷумҳурии Тоҷикистон Фарҳод Раҳимӣ, кордори Сафорати ИМА Кевин Коверт ва директори Агентии амнияти ядроӣ ва радиатсионӣ Илҳом Мирсаидов сухан карданд.

Зикр гардид, ки ҳадафи Ҳукумати Ҷумҳурии Тоҷикистон ва ИМА дар мубориза бар зидди таҳдиди силоҳи қатли ом ва маводи марбута ба он ва таъмини амнияти марзҳои Тоҷикистон як аст. Ифтитоҳи чунин марказ дар хаёти Академияи илмҳо воқеаи илмӣ ва сиёсӣ ба шумор меравад. Имрӯз тамоми мардуми сайёра эҳтиёҷ доранд, ки бо ҳама гуна яроқҳои қатли ом мубориза баранд ва аз гардиши ғайриқонунии он пешгирӣ кунанд. Изҳори умед карда шуд, ки марказ ба кормандони  Агентии амнияти ядроӣ ва радиатсионӣ баҳри такмили сатҳи касбии ҳайати шахсӣ дар истифодаи шаклу усулҳои пешгирӣ ва зуд ошкор намудани силоҳи қатли ом, инчунин силоҳи маъмулӣ кумаки назаррас хоҳад расонд. Ҳамчунин марказ барои бартараф намудани маводи ғайриқонунӣ ва шаклҳои дигари қочоқ, ки марзҳои Тоҷикистонро убур карда метавонад, мусоидат мекунад.

Сипас, маросими ба имзо расонидани санади ҳамкорӣ ва санади супоридани таҷҳизот сурат гирифт, ки онро кордори Сафорати ИМА Кевин Коверт ва директори Агентии амнияти ядроӣ ва радиатсионӣ Илҳом Мирсаидов ба имзо расониданд.

Мавриди зикр аст, ки дар бунёди марказ Сафорати ИМА дар Ҷумҳурии Тоҷикистон ба маблағи 370 ҳазор доллари ИМА саҳмузорӣ кардаанд. Марказ аз чор майдони таълимии берунӣ, гузаргоҳи бо нуқтаи санҷишӣ таҷҳизонидашуда, дарвозаҳо барои гузариши нақлиёт ва пиёдагардон пешбинишуда ва толори маҷлисгоҳ иборат мебошад.

Ёдовар мешавем, ки моҳи феврали соли 2016 бо Қарори Ҳукумати Ҷумҳурии Тоҷикистон Нақшаи миллии амал тасдиқ гардид. Ин нақша як қатор чорабиниҳо ва бандҳои мухталифро доро буда, баҳри бартараф кардани терроризм бо истифода аз силоҳи қатли ом равона карда шудааст. Дар нақша ҷалби мутахассисон аз мақомоти ҳифзи ҳуқуқ ва вазорату идораҳои марбута, ки ба пешгирии терроризм алоқамандӣ дорад, таҳия гардидааст. Дар ин марказ кормандони мақомоти ҳифзи ҳуқуқ бо истифода аз таҷҳизоти муосир тартиби пешгирии терроризмро меомӯзанд.

Тавре директори Агентии амнияти ядроӣ ва радиатсионӣ Илҳом Мирсаидов ба АМИТ «Ховар» хабар дод, дар марказ дар як сол 6 омӯзиши минтақавӣ ба нақша гирифта шудааст, ки даври аввали он аз 16 то 20 апрел баргузор хоҳад гашт.

«Нақшаи миллии амал то соли 2021-ро дар бар гирифта, тибқи он таҷҳизонидани тамоми гузаргоҳҳои сарҳадии Тоҷикистон ва  фурудгоҳҳои байналмилалӣ бо порталҳои радиатсионӣ дар назар дошта шудааст. Дар айни замон дар 12 гузаргоҳи сарҳадӣ (Чин, Ӯзбекистон ва Афғонистон) порталҳои радиатсионӣ пурра васл гардида, то соли 2021 тамоми 33 гузаргоҳи сарҳадӣ бо порталҳои радиатсионӣ муҷаҳҳаз мешаванд. Соли 2018 дар назар аст, ки Фурудгоҳи байналмилалии Душанбе бо порталҳои радиатсионӣ муҷаҳҳаз гардад»,-илова намуд манбаъ.

Мавҷуда АНВАРӢ,

АМИТ «Ховар»