Шукурҷон Зуҳуров бонувони Парлумонро табрик намуд

ДУШАНБЕ, 07.03.2018 /АМИТ «Ховар»/. Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров дар арафаи ҷашни  Рӯзи Модар, ки ҳамасола дар мамлакат 8 март ҷашн гирифта мешавад, бонувони Парлумонро табрик гуфт.

Шукурҷон Зуҳуров  иброз намуд, ки боиси фараҳмандӣ ва саодат аст, ки ҳар яки мо имрӯз дар фазои суботу ороми мамлакат ҷашни фархундаи Рӯзи Модарро истиқбол менамоем.   Рӯзи Модар дар баробари муҳимтарин санаи таърихӣ ҷашни фархунда низ шинохта шудааст ва бо ташаббуси Асосгузори сулҳу ваҳдати миллӣ – Пешвои миллат ин сана ба ҷашни миллиямон мубаддал гардидааст, зеро он бо номи бузурги Модар пайванди ногусастанӣ дорад.

Бо ишора ба ҷойгоҳи зан-модар дар ҷомеаи Тоҷикистон  Шукурҷон Зуҳуров гуфт, ки аз соли 1997 инҷониб бо дастури Президенти муҳтарам барои ҷавондухтарони лаёқатманди навоҳии дурдаст квотаҳои президентӣ роҳандозӣ шудаанд, ки ҳамасола аз 500 то 710 нафар духтарони лаёқатманд аз 61 шаҳру навоҳии мамлакат тариқи  квотаҳои президентӣ ба таълим фаро гирифта мешаванд. Вобаста ба тамоми шаклҳои таҳсил аз соли 1997 то имрӯз наздик ба 140 ҳазор нафар ҷавондухтарон донишгоҳу донишкадаҳои олиро хатм намуда, дар тамоми соҳаҳо меҳнат мекунанд. Аз ҳисоби ин ҷавондухтарон имрӯз мо омӯзгорон, табибон, муҳандисону олимон, ҳуқуқшиносону барномасозон, раисони ҷамоатҳо, раисони ноҳияҳо, муовинони раисони шаҳру вилоят ва сиёсатмадорони намоён дорем.

“Танҳо бонувони сиёсатмадору тавоно ва мутахассисони барҷастаи соҳаҳои мухталиф 20 фисади вакилони Маҷлиси намояндагонро ташкил медиҳанд. Инчунин дар кумитаву комиссияҳо, шуъбаву бахшҳо ва дигар сохторҳои дастгоҳи Маҷлиси намояндагони Маҷлиси Олии Ҷумҳурии Тоҷикистон бонувону занон ба корҳо ҷалб шудаанд, ки бо самимияти хосса ва назофату меҳнатдӯстии хеш кори Маҷлиси намояндагонро рангин мекунанд.

Яъне, суботи комил ва ваҳдати сартосарии Тоҷикистони соҳибистиқлол барои ЗАН – МОДАРИ тоҷик як марҳилаи нави зиндагиро фароҳам овард, ки инро мо дар чеҳраи гулгуни ҳар як модару хоҳар ва бонуи шарафманди тоҷикистонӣ дида метавонем”,- гуфт дар анҷом Шукурҷон Зуҳуров.