Қамишзори маҳаллаи Шафақ ба майдончаи варзишии замонавӣ мубаддал гардид
![](https://khovar.tj/wp-content/uploads/2018/06/v__vf.jpg)
ДУШАНБЕ, 14.06.2018 /АМИТ «Ховар»/. 13 июн дар маҳаллаи Шафақи шаҳри Душанбе майдончаи варзишӣ барои бозиҳои футболи хурд, баскетбол ва волейбол ба истифода дода шуд. Иқдоми мазкур бо мақсади ободу зебо гардонидани пойтахти мамлакат – шаҳри Душанбе амалӣ гардид.
Тавре аз бахши таҳлилу иттилоотии Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» иттилоъ доданд, майдончаи варзишӣ аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Кумитаи миллии олимпии Тоҷикистон дар доираи барномаи «Олимп Осиё»-и Шӯрои олимпии Осиё сохта шуд.
Барои сохтмони майдонча 882 ҳазору 188 сомонӣ харҷ шуда, корҳои сохтмонӣ аз ҷониби ҶДММ «Муҳайё» дар муддати 5 моҳ ба анҷом расонида шуданд. Дар сохтмон 20 нафар коргарони маҳаллӣ ва 10 техникаи сохтмонӣ ҷалб шуда, дар атрофи майдонча гулгашти зебо ташкил намуданд. Дар он тариқи ҳашар 300 ниҳоли дарахтони сояафкану мевадиҳанда ва 26 дарахти 10-солаи ороишӣ шинонида шудааст, ки барои фароғати сокинони маҳалла мусоид мебошад.
Ба иттилои манбаъ, замине, ки барои сохтмони майдонча ҷудо шудааст, қаблан қамишзор буда, наврасону ҷавонони маҳалла дар як гӯшаи он дар шароити номувофиқ ба бозиҳои варзишӣ машғул мешуданд.