САНГВОР: 62 нафар омӯзгорони ҷавон бо кор таъмин гардиданд

САНГВОР, 04.07.2018. /АМИТ «Ховар»/.  Бахши Агентии  меҳнат ва шуғли аҳолӣ дар ноҳияи Сангвор давоми  шаш моҳи соли 2018 барои ба низом даровардани  фаъолияти шаҳрвандони бешуғл ва бо ҷои кори доимӣ ва мавсимӣ таъмин намудани онҳо мувофиқи тавсияномаҳо  233  нафар шахсони бекорро бо ҷойи кори доимӣ ва мавсимӣ таъмин намуд. Аз ҷумла, 62 нафари онҳо омӯзгорони ҷавон мебошанд, ки  дар соҳаи маориф ба ҳайси омӯзгор ба кор таъмин гардиданд.  Дар ин бора  аз шуъбаи рушди иҷтимоӣ ва робита бо ҷомеаи ноҳия ба хабарнигори АМИТ «Ховар» иттилоъ доданд.

Инчунин  ба 33  нафар  қарзи  бефоиз  ба  маблағи  128 ҳазору 860  сомонӣ аз  ҳисоби  маблағҳои   бозгаштшуда  барои фаъолияти соҳибкорӣ ҳамчун кумаки молиявӣ дода шудааст, ки  аз он ба соҳаи чорводорӣ 37 000 сомонӣ, соҳибкорӣ  18 000 сомонӣ,  занбӯри асалпарварӣ  56 500 сомонӣ ва ба соҳаи картошкапарварӣ 17 360  сомониаш рост меояд.

Тибқи иттилои манбаъ, соли  равон дар  асоси  роҳхатҳои Агентии  меҳнат ва шуғли аҳолии ноҳия 85 нафар  занони хонашин ҳунарҳои  дӯзандагӣ,  бофандагӣ, қолинбофӣ ва гулдӯзиро тавассути филиали «Маркази таълимии калонсолони Тоҷикистон» дар ноҳияи  Сангвор  омӯхта, соҳиби шаҳодатномаҳои касбомӯзӣ гардиданд.