Ҳукумати Тоҷикистон ҳамкориро бо мақомоти авиатсионии давлатҳои хориҷӣ тавсеа мебахшад

ДУШАНБЕ, 30.07.2018/АМИТ «Ховар»/. Ҷумҳурии Тоҷикистон бо мақомоти авиатсионии  кишварҳои хориҷӣ дар самти васеъ намудани ҷуғрофиёи парвозҳо ҳамкории мутақобилан судмандро тақвият медиҳад.

Директори Агентии авиатсияи граждании назди Ҳукумати  Ҷумҳурии Тоҷикистон  Икром Субҳонзода дар  нишасти матбуотӣ   30 июл дар Душанбе гуфт, ки  алҳол лоиҳаи  созишномаҳо   оид ба алоқаи ҳавоӣ байни Ҳукумати Ҷумҳурии Тоҷикистон  ва давлатҳои  Финляндия, Франсия, Шри Ланка, Ветнам, Малайзия, Гурҷистон, Молдова, Аморати Муттаҳидаи Араб, Салтанати Уммон, Шоҳигарии Британияи Кабир  ва Ирландияи Шимолӣ   дар сатҳи баррасии ҷонибҳо қарор дорад.

Зикр шуд, ки дар ин давра ширкатҳои   ҳавопаймоии ватанӣ  дар 33 самт ба 10 давлати хориҷӣ, назири  Россия, Чин, Қазоқистон, Қирғизистон, Ӯзбекистон, Эрон, Аморати Муттаҳидаи Араб, Туркия, Ҳиндустон ва Олмон  парвозҳоро анҷом доданд.

Директори Агентӣ ҳамчунин зикр намуд, ки  «дар ин давра фурудгоҳҳои байналмилалии  Ҷумҳурии Тоҷикистон- Душанбе, Хуҷанд, Кӯлоб ва Бохтар  ба зиёда аз 928 ҳазор нафар   мусофирон хизмат расониданд».

Аз ҷумла,   Фурудгоҳи байналмилалии Душанбе  ба  зиёда аз 615 ҳазор, Фурудгоҳи байналмилалии  Хуҷанд ба 262 ҳазор, Кӯлоб 50 ҳазор мусофир ва Фурудгоҳи байналмилалии Бохтар  ба 3 ҳазор мусофир хизмат расонидаанд.

Инчунин  дар ин муддат аз  ҷониби ширкатҳои ҳавопаймоии мамлакат  -«Тоҷик Эйр» ва «Сомон Эйр»  беш аз 385 ҳазор мусофир интиқол дода шудааст, ки аз ин омор интиқоли 152 ҳазор мусофир  ба  ширкати ҳавопаймоии  «Тоҷик Эйр» ва  зиёда аз 233 ҳазор мусофир ба ширкати ҳавопаймоии «Сомон Эйр»  рост меояд.