Парлумони Тоҷикистон ба лоиҳаи қонун «Дар бораи тамғаҳои молӣ ва тамғаҳои хизматрасонӣ» тағйирот ворид менамояд

ДУШАНБЕ, 22.10.2018/АМИТ «Ховар»/. Аъзои Шӯрои палатаи поёнии Парлумони Тоҷикистон дар ҷаласаи Шӯро, ки имрӯз таҳти раёсати Раиси  Маҷлиси  намояндагон Шукурҷон Зуҳуров доир гардид, лоиҳаи Қонуни Ҷумҳурии Тоҷикистон «Дар бораи берун баровардан ва ворид намудани сарватҳои таърихию фарҳангӣ»-ро  баррасӣ намуданд.

Раиси Кумитаи илм, маориф, фарҳанг ва сиёсати ҷавонони Маҷлиси намояндагон Лутфия Раҷабова ҳангоми баррасии масъалаи мазкур гуфт, ки лоиҳаи қонун бо мақсади мутобиқат ба Конститутсияи Ҷумҳурии Тоҷикистон, Қонуни Ҷумҳурии Тоҷикистон «Дар бораи санадҳои меъёрии ҳуқуқӣ», муқаррар намудани якчанд меъёрҳои нав вобаста ба талаботи замони муосир, инчунин густариши муносибатҳо ва робитаҳои фарҳангии Ҷумҳурии Тоҷикистон бо дигар давлатҳо таҳия гардидааст. Он аз  3 боб ва 23 модда иборат  мебошад. Сохтори лоиҳаи қонун ба талаботи қонунгузории ҷорӣ мутобиқ карда шуда, ба он моддаҳои нав илова карда мешаванд.

Аз ҷумла, дар моддаи 7 танзими давлатии берун баровардан ва ворид намудани сарватҳои таърихию фарҳангӣ, моддаи 8 таъсиси Шӯро оид ба ҳифзи сарватҳои таърихию фарҳангӣ ва рушди мубодилаи байналмилалии арзишҳои фарҳангӣ, моддаи 10 экспертизаи давлатии сарватҳои таърихию фарҳангӣ, моддаи 13 муваққатан ворид намудани сарватҳои таърихию фарҳангӣ, моддаи 19 тартиби истифодаи сарватҳои таърихию фарҳангии мусодирашуда, моддаи 20 боҷу пардохтҳо ҳангоми берун баровардан ва ворид намудани сарватҳои таърихию фарҳангӣ пешбинӣ карда шудаанд.

Аъзои Шӯро ҳамзамон лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи тамғаҳои молӣ ва тамғаҳои хизматрасонӣ»-ро барарсӣ намуданд.

Раиси  Кумита оид ба энергетика, саноат, сохтмон ва коммуникатсияи Маҷлиси намояндагон  Садриддин Шарифов дар ҷаласа  гуфт,   ки лоиҳаи қонун бо мақсади фароҳам овардани шароит барои иҷро ва татбиқи меъёрҳои муқаррарнамудаи Қонуни мазкур ба воситаи санадҳои зерқонунӣ ва мутобиқ намудани он ба талаботи пешбининамудаи Кодекси граждании Ҷумҳурии Тоҷикистон, Конвенсияи Париж  «Оид ба ҳифзи моликияти саноатӣ», Созишномаи Мадрид «Дар бораи бақайдгирии байналмилалии тамғаҳо» ва Шартномаи Сингапур  «Дар бораи қонунҳои тамғаи молӣ» таҳия гардидааст. Ворид  намудани тағйиру иловаҳо ба лоиҳаи қонуни мазкур барои дастгирии соҳибкорӣ, пешниҳод намудани имтиёзҳои иловагӣ ва содагардонии расмиёт ба шахсони воқеӣ ва ҳуқуқӣ равона мегардад.