Аъзои гурӯҳи корӣ ба сокинони шаҳри Норак Паёми Пешвои миллатро шарҳ доданд

НОРАК, 09.01.2019 /АМИТ «Ховар»/. Дар Қасри фарҳанги шаҳри Норак бо иштироки раиси Суди Олии Ҷумҳурии Тоҷикистон Шермуҳаммад Шоҳиён, вакили Маҷлиси намояндагони Маҷлиси Олии Ҷумҳурии Тоҷикистон Ҳилолбӣ Қурбонзода ва фаъолону сокинони шаҳр доир ба баррасии Паёми Президенти Ҷумҳурии Тоҷикистон оид ба  самтҳои сиёсати дохилӣ ва хориҷии кишвар ва роҳҳои амалигардонии дастуру супоришҳое, ки аз Паёми навбатӣ   бармеоянд,  ҷамъомад  баргузор гардид.

Дар ҷамъомад зикр гардид, ки Паёми Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳнамои ҳар як фарди ҷомеа ба ҳисоб  рафта, дар амал татбиқ намудани он кафолати амнияти кишвар ва рушди бонизоми иҷтимоию иқтисодии мамлакат мебошад. Амалисозии он аз ҳар фарди ватандӯст ҳисси баланди масъулиятшиносӣ талаб менамояд.

Меҳмонон дар доираи сафари корияшон ба шаҳри Норак барои тафсиру таблиғи Паёми навбатии Пешвои миллат муҳтарам Эмомалӣ Раҳмон доир ба нишондиҳандаҳои иқтисодии кишвар, рушди соҳаҳои иқтисодиёти миллӣ,  солҳои рушди деҳот, сайёҳӣ ва ҳунарҳои мардумӣ, имконияту шароити мусоиди табиӣ ва иқлими Тоҷикистон, баланд бардоштани маърифати ҳуқуқии шаҳрвандон, шомил нагардидани  ҷавонон ба гурӯҳҳои ифротӣ, бунёди инфрасохтори мувофиқ ба талаботи муосир ва шарҳи тағйиру иловаҳо ба қонунҳои амалкунанда андешаҳои худро баён намуданд.