Бояд барои рушди қобилияти зеҳнии кӯдакон шароити мусоид фароҳам оварда шавад-бардошт аз мулоқот оид ба шарҳи Паёми Пешвои миллат
![](https://khovar.tj/wp-content/uploads/2019/01/8773d59e4db2fb0709d62b1a7a52eedf.jpg)
ДУШАНБЕ, 09.01.2019 /АМИТ «Ховар»/. Бо мақсади расонидани муҳтавои Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии мамлакат аз ҷониби масъулини Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо ҷавонону варзишгарон ва ҷомеаи шаҳрвандӣ мулоқоту суҳбатҳои судманд бомаром идома доранд.
Аз ҷумла, 8 январи соли равон бо иштироки раиси Кумитаи кор бо ҷавонон ва варзиш Аҳтам Абдуллозода, вакили Маҷлиси намояндагони Маҷлиси Олии Ҷумҳурии Тоҷикистон Зуфар Исмоилзода ва муовини раиси ноҳияи Деваштич дар ҷамоатҳои деҳоти Росровут, Ваҳдат, Исмоили Сомонӣ, Далёни Боло ва Далёни Поёни ноҳияи Деваштич вохӯриҳои судманд доир гардиданд.
Раиси Кумитаи кор бо ҷавонон ва варзиш Аҳтам Абдуллозода иброз намуд, ки «Паёми Пешвои миллат китоби ҳикмату насиҳат ва нақшаи солонаи ҳар як фарди равшанфикри ҷомеа мебошад. Дар Паёми имсолаи хеш Сарвари давлат ба масъалаҳои маориф, тандурустӣ, ҳифзи иҷтимоӣ, баланд бардоштани мақоми зан дар ҷомеа, рушди соҳаи варзиш ва ҷавонон, омодагӣ ба ҷашни миллӣ- 30 солагии Истиқлолияти давлатии Ҷумҳурии Тоҷикистон диққати махсус дода, барои ҳалли мушкилиҳои дар ин самт ҷойдошта ба масъулин дастуру супоришҳои мушаххас доданд».
Аз ҷумла, Пешвои миллат ба инкишофи зинаи таҳсилоти томактабӣ диққати ҷиддӣ дода, зикр намуданд, ки бояд шумораи муассисаҳои томактабиро бамаротиб зиёд намоем ва барои рушди қобилияти зеҳнии кӯдакон шароити мусоид фароҳам созем.
Дар доираи барномаҳои давлатӣ ва бо иштироки аҳолӣ дар се соли оянда беш аз 1050 муассисаи таҳсилоти томактабӣ ва умумӣ бунёд карда мешаванд, ки қисми зиёди онҳо дар деҳоти мамлакат пешбинӣ гардидаанд.
Ёдовар мешавем, ки аз ҷониби масъулини Кумитаи кор бо ҷавонон ва варзиши назди Ҳукумати Ҷумҳурии Тоҷикистон чунин вохӯриҳои судманд оид ба муҳтавои Паёми Пешвои миллат бо соҳибкорони ҶДММ бозори «Корвон», бозори «Меҳргон», кормандони Бонки миллии Тоҷикистон ва Ширкати саҳомии холдингии кушодаи «Барқи тоҷик» гузаронида шуданд.