Чаро дарахтони боғи навбунёди Дашти Марзои ноҳияи Файзобод хушк шудаанд?- бардошт аз нишасти матбуотии ноҳия

ФАЙЗОБОД, 29.01.2019 /АМИТ «Ховар»/.  Зимни нишасти матбуотии ноҳияи Файзобод хабарнигори минтақавии АМИТ «Ховар» Субҳониддини Маҳмуд сабабҳои ба роҳ намондани истеҳсоли гӯшти парандаро дар корхонаи «Мурғи ҳилол»   ва обёрӣ нагардидану хушкшавии дарахтони 120 гектар боғи навбунёди Дашти Марзои Ҷамоати деҳоти Қалъаи Дашти ноҳияро пурсон шуд.  

Раиси ноҳияи Файзобод Миралӣ Раҷабзода зимни нишасти матбуотӣ  иброз дошт, ки яке аз сабабҳои  асосии  истеҳсол нагардидани гӯшти паранда дар корхонаи «Мурғи ҳилол»- ин буҳрони молиявии ҷаҳонӣ ва муфлисшавии корхонаи мазкур мебошад. Вале имрӯзҳо бо дастгирии  Пешвои миллат муҳтарам Эмомалӣ Раҳмон ва кӯшиши роҳбарияти корхона саршумори парранда ба 400 ҳазор сар расидааст. Дар ин корхона дар як сол 25 млн дона тухм истеҳсол мешавад.

Тибқи нақша, соли 2019  дар  корхонаи «Мурғи ҳилол» истеҳсоли гӯшти мурғ ба роҳ монда мешавад.    Бояд зикр намуд, ки роҳандозии истеҳсоли гӯшти паранда дар корхонаи мазкур яке аз супоришҳои Пешвои миллат муҳтарам Эмомалӣ Раҳмон зимни сафари корияшон ба ноҳияи Файзобод мебошад.

Раиси Ҷамоати деҳоти Қалъаи Дашти ноҳияи Файзобод Аскар Саидов оид ба хушкшавӣ ва обёрӣ нагардидани боғи навбунёди Дашти Марзо иброз дошт, ки «боғи мазкурро бо саҳми хоҷагидорон ва тавассути  насосҳои обкаш обёрӣ менамоем. Соли 2018 боғдорон  аз як қисми он ҳосил гирифтанд».

Бояд гуфт, ки  моҳи апрели соли 2014 дар майдони 120 гектар бо иштироки Президенти мамлакат муҳтарам Эмомалӣ Раҳмон  бунёди боғи нави себу нок дар мавзеи хушбоду ҳавои Дашти Марзои Ҷамоати деҳоти Қалъаи Дашт оғоз гардид. Ин боғ ба таври намунавӣ бояд дар майдони васеъ доман паҳн мекард.

Тибқи нақша, бояд ба бунёд ва нигоҳубини ин боғ 60 хоҷагии деҳқонӣ машғул мешуданд, ки ба ҳисоби миёна ба ҳар яки он 2 гектарӣ рост меомад. Мутаассифона,   аз сабаби хунукназарии масъулини Ҷамоати деҳоти Қалъаи дашт нисбат ба таъмини оби полезӣ ба хоҷагиҳо  ва беаҳамиятии хоҷагидорон як қисми дарахтон хушк шуда, қисмати зиёди он нашъунамо наёфтаанд. Роҳбарону масъулин бо гузашти беш аз 4 сол онро ҳамчун боғи намунавӣ ба ҷомеа пешниҳод карда натавонистанд.