ПАЁМ-ОМИЛИ МУҲИМИ РУШДИ МАМЛАКАТ. Гузориш аз маҷлиси ҳизбии ташкилоти ибтидоии ҳизбии «Эҷод» дар АМИТ «Ховар»

ДУШАНБЕ, 18.01.2019. /АМИТ «Ховар»/. Дар маҷлиси ҳизбии ташкилоти ибтидоии ҳизбии «Эҷод»-и АМИТ «Ховар», ки бо иштироки Директори агентӣ — Раиси ташкилоти ибтидоии ҳизбӣ C.Сиддиқ ва аъзои ташкилот баргузор гардид, Паёми навбатии Асосгузории сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон тавзеҳ дода шуд. Дар ин бора дирӯз дар саҳифаи расмии КИ ҲХДТ дар ноҳияи Исмоили Сомонӣ дар шабакаи иҷтимоии «Фейсбук» хабар дода шудааст.

Тавре дар хабар омадааст, зимни тавзеҳи Паём Раиси ташкилот зикр кард, ки Паёми Президенти мамлакат ба Маҷлиси Олии Ҷумҳурии Тоҷикистон, ки 26 декабри соли 2018 ирсол гардид, омили муҳими рушди мамлакат ва рӯйдоди сарнавиштсоз маҳсуб ёфта, дар назди қишрҳои ҷомеа вазифаҳои умдаи ҳалталаб мегузорад. Иҷрои онҳо рушди ҳамаҷонибаи кишвари моро дар соли равон ва ояндаи наздик таъмин менамояд.

Мавсуф афзуд, ки Сарвари давлат дар Паёми худ муҳимтарин дастовардҳо ва рӯйдодҳои соли 2018, ҳадафҳои нави стратегии мамлакат, ташаббусҳои Тоҷикистон дар арсаи байналмилалӣ, аз кишвари аграрӣ — саноатӣ ба кишвари саноатӣ — аграрӣ табдил додани мамлакат, Солҳои рушди деҳот, сайёҳӣ ва ҳунарҳои мардумӣ эълон намудани солҳои 2019 — 2021-ро махсус зикр намуданд.

Ҳамчунин таъкид гардид, ки ҳар як шаҳрванди худшиносу ватандӯсти Тоҷикистон, аз ҷумла ҳар як узви ташкилоти ибтидоии ҳизбии «Эҷод» барои саҳми арзанда гузоштан дар татбиқи амалии нуктаҳои дар Паём зикргардида масъул мебошад.

«Бинобар ин мо бояд барои ободию пешрафти Ватани маҳбубамон содиқона фаъолият намуда, дар атрофи сиёсати пешгирифтаи созандаи Пешвои муаззами миллат муҳтарам Эмомалӣ Раҳмон муттаҳид бошем», — гуфт C.Сиддиқ.