Сокинони ноҳияи Ванҷ Паёми Пешвои миллат Эмомалӣ Раҳмон ба Маҷлиси Олиро раҳнамои амалҳои созандаи хеш медонанд

ДУШАНБЕ, 11.01.2019 /АМИТ «Ховар»/. Сокинони меҳнаткаши ноҳияи Ванҷ дар қатори сокинони минтақаҳои дигари мамлакат бо рӯҳияи баланди ифтихор аз ватандориву соҳибистиқлолӣ Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олиро раҳнамои амалҳои созандаи хеш дониста, нуктаҳои муҳими онро мавриди амал қарор медиҳанд.  

Нуктаҳои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ оид ба самтҳои сиёсати дохиливу хориҷиро раиси Кумитаи рушди сайёҳии назди Ҳукумати Ҷумҳурии Тоҷикистон Нуъмон Абдуғаффорзода ва раиси ноҳияи Ванҷ Ҷаббори Қосим ба сокинони деҳоту ҷамаотҳои ноҳия шарҳ доданд.

Зикр гардид, ки Паёми Президенти мамлакат ба Маҷлиси Олии Ҷумҳурии Тоҷикистон омили муҳими мусоидаткунандаи рушди ҷомеа ва рӯйдоди сарнавиштсоз маҳсуб ёфта, дар назди қишрҳои ҷомеа вазифаҳои умдаи ҳалталаб мегузорад, ки иҷрои онҳо рушди ҳамаҷонибаи кишвари моро дар соли равон ва ояндаи наздик таъмин менамояд.

Сокинони ноҳия бо фараҳмандӣ изҳор медоранд, ки бо дастгириҳои пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон симои маркази ноҳия ба куллӣ дигаргун шуда, як қатор иншооти муҳим бо иштироки бевоситаи Сарвари давлат ифтитоҳ гардиданд.

Бо дастури Президенти мамлакат корҳои лоиҳавӣ оид ба бунёди маҷмааи меҳмонхона, боғи фарҳангу фароғатӣ, боғчаи кудакона, мумфарш намудани роҳҳои маркази ноҳия ва чароғонкунии онҳо бомаром идома дорад.

Сокинони ноҳия, аз ҷумла соҳибкорон дар амалисозии тадбирҳо бахшида ба истиқболи сазовори 30-солагии Истиқлолияти давлатии Ҷумҳурии Тоҷикистон дар асоси нақшаи чорабиниҳои тасдиқшуда саҳми муносиб гузошта истодаанд.