«ГУФТУГӮ АЗ ДӮСТӢ ДОРЕМ МО». Дар Душанбе таҳти ин унвон маҷмӯаи нависанда ва публисист Сулаймон Эрматов нашр гардид
ДУШАНБЕ, 25.02.2019 /АМИТ «Ховар»/. Матбааи «Шарқи озод» маҷмӯаеро бо номи «Гуфтугӯ аз дӯстӣ дорем мо» ба чоп расонд, ки муаллиф ва мураттиби он узви Иттифоқи нависандагони Тоҷикистон Сулаймон Эрматов мебошад.
Маҷмӯаи мазкур ба муносибатҳои чандинасраи мардумони тоҷику ӯзбек, ки бо талошҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон Шавкат Мирзиёев такони ҷиддӣ гирифтанд, бахшида шудааст.
Маҷмӯа асарҳои нависандагони тоҷику ӯзбекро, ба монанди Абдулло Орифов, Эркин Воҳидов, Улмас Умарбеков, Сироҷиддин Саид, Аскар Ҳаким, Саттор Турсун, Гулназар, Кароматулло Мирзоев, Низом Қосим, Давлат Сафар, Муҳаммадалӣ Аҷамӣ ва дигарҳоро, ки дӯстии қавии ду мардуми ҳамсояро мадҳ мекунанд, дар бар мегирад.
Тарҷумаи осори баъзе аз нависандагон ва шоиронро аз забони ӯзбекӣ ба тоҷикӣ худи мураттиб анҷом додааст.
Пас аз сафарҳои мутақобилаи давлатии Президентҳои Ӯзбекистон ва Тоҷикистон ба Душанбе ва Тошканд рафтуои озоди наздикону пайвандони шаҳрвандони ҳарду давлат имконпазир гардид. Дар робита ба ин рӯйдоди муҳим дар воситаҳои ахбори омма як зумра хабарҳо нашр гардиданд ва ба унвони Ҳукумати ду давлати ҳамсоя, ки таърихан дӯстӣ, ҳамкорӣ ва ҳусни ҳамҷавории абадӣ доранд, шодбошиҳову миннатдориҳо садо доданд.
Дар маҷмӯа ҳамчунин гуфтаҳои ҷавонону калонсолон, меҳнаткашони одӣ, масалан, аз ноҳияи Шаҳритуси Тоҷикистон, ки бо вилояти Сурхондарёи Ӯзбекистон ҳамсарҳад мебошад, ҷамъоварӣ шудаанд.
Дар охири маҷмӯа шеърҳои классикони адабиёти ду халқ — Мирзо Турсунзода ва Ғафур Ғулом ва дигар шоирон, ки имрӯз ба ҳифзи дӯстӣ ва бародарӣ ҳамчун гавҳараки чашм, кафили ҳаёти осоишта, шукуфоӣ ва некӯаҳволии мардуми мо даъват мекунанд, оварда шудаанд.
Маҷмӯа бо суратҳои ранга ороиш ёфта, дар муқоваи он акси Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон Шавкат Мирзиёев ҷойгир карда шудаанд.
Мансур Суруш,
шореҳи адабии АМИТ «Ховар»
АРЗҲОИ ДӮСТӢ. Узбекистон шарики стратегӣ ва ҳампаймони боэътимоди Тоҷикистон мебошад
Қаҳрамонони мусобиқаи «Dushanbe Grand Slam-2024» дар Осорхонаи миллӣ бо таъриху тамаддуни миллати тоҷик шинос шуданд
«РОЗА ВОСТОКА». Маҳина Нурова аз Тоҷикистон сазовори Шоҳҷозаи ин фестивал гардид
Дар Тоҷикистон марҳилаи нави корҳои бостоншиносӣ оғоз гардид
«ТОҶИКОНА МЕПӮШЕМ!». Дар Донишкадаи давлатии санъати тасвирӣ ва дизайни Тоҷикистон фестивали мӯд баргузор гардид
«ДИЛНАВИШТА». Таҳти чунин унвон маҳфили эҷодии Ибодулло Машраб баргузор гардид
«ҲЕҶ КАС ВА ҲЕҶ ЧИЗ ФАРОМӮШ НАШУДААСТ». Дар Осорхонаи миллии Тоҷикистон намоиши ҷашнӣ ифтитоҳ ёфт
«МИРЗО ТУРСУНЗОДА ДАВОМДИҲАНДАИ НАЗМИ ҲАЗОРСОЛАИ ХАЛҚИ ТОҶИК МЕБОШАД». Андешаҳои адибони бузург дар васфи шоир
Дар Осорхонаи миллӣ маҳфили «Шоҳномахонӣ» баргузор гардид
«ОН ҚАДАР ДАР ДИЛПИСАНДӢ ДИЛПИСАНД АСТӢ, ВАТАН…». Имрӯз зодрӯзи Қаҳрамони Тоҷикистон устод Мирзо Турсунзода аст
«БЕҲТАРИН ТАРҒИБГАРИ ЛИБОСИ МИЛЛӢ-2024». Дар Донишгоҳи технологии Тоҷикистон даври ҷамъбастии озмун гузаронида шуд
«ҲУНАР БЕҲТАР АЗ ЗАР БУВАД». Дар Бадахшон даври вилоятии фестивали ҳунармандон ҷамъбаст гардид
