Шурӯъ аз 25 феврал дар Душанбе хатсайри нави автобус ба фаъолият оғоз мекунад

ДУШАНБЕ, 22.02.2019. /АМИТ «Ховар»/. Шурӯъ аз 25 феврали соли 2019 дар пойтахти мамлакат хатсайри нави автобусии №29 ба фаъолият оғоз менамояд.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба мухбири АМИТ «Ховар» хабар доданд, хатсайри мазкур аз Беморхонаи Қарияи боло то  маҳаллаи Пахтакор тӯл кашида, автобусҳо тавассути хиёбону кӯчаҳои А.Сино, С. Шерозӣ, Н. Қарабоев, Шестопалов ва Борбад ҳаракат менамоянд.

«Мақомоти иҷроияи ҳокимияти давлатии шаҳри Душанбе аз сокинон ва меҳмонони пойтахт эҳтиромона хоҳиш менамояд, ки аз хизматрасонии автобусҳои муосир  дар хатсайри автобусии №29  истифода баранд», -хабар дод манбаъ.

Ёдовар мешавем, ки ду соли охир дар хатсайрҳои автобусии ҳудуди пойтахти мамлакат автобусҳои замонавӣ роҳандозӣ карда шуда, онҳо ба аҳолии шаҳр хизмат расонида истодаанд.