Дар Суғд Фестивали вилоятии ҳунарҳои мардумӣ баргузор мегардад

ХУҶАНД, 28.03.19. /АМИТ «Ховар»/.  Моҳи апрели соли равон дар миқёси шаҳру ноҳияҳои вилояти Суғд  дар доираи Солҳои рушди деҳот, сайёҳӣ ва ҳунарҳои мардумӣ бо ибтикори мақомоти иҷроияи ҳокимияти давлатии вилоят таҳти унвони «Ҳунар – беҳтар  аз зар бувад» Фестивали вилоятии ҳунарҳои дастии мардумӣ баргузор мегардад.

Тавре ба АМИТ Ховар аз Муассисаи давлатии «Мактаби эҳё ва рушди атласу адрасбофии дастӣ ва дигар ҳунарҳои халқӣ»  иттилоъ доданд, фестивали мазкур бо ҳадафи эҳёи анъанаҳои аҷдодии ҳунарҳои мардумӣ ва тарғиби таҷрибаи пешқадами ҳунармандони варзида ташкил мешавад. Он дар ду давр — даври аввал дар шаҳру ноҳияҳо ва даври дуюм дар маркази вилоят баргузор гардида, дар он ҳамаи ҳунармандони хоҳишманд метавонанд бо маҳсули дасти худ иштирок намоянд.

Фестивал аз рӯи чор бахш: «Беҳтарин таоми миллӣ ва нону шириниҳо», «Беҳтарин ҳунари мардумӣ бо истифода аз матоъ ва пашму пӯст», «Беҳтарин ҳунари мардумӣ бо истифода аз чӯб ва гилу гаҷ» ва «Беҳтарин ҳунари мардумӣ бо истифода аз санг ва оҳан» гузаронида шуда, ғолибон бо мукофотпулӣ дар ҳаҷми 1000, 2000 ва 3000 сомонӣ сарфароз гардонида мешаванд.

Бояд гуфт, ки ҳамасола баҳри дастгирӣ ва рушд додани фаъолияти соҳибкории занони ҳунарманду эҷодкор аз ҷониби Мақомоти иҷроияи ҳокимияти давлатии вилояти Суғд грантҳои раиси вилоят таъсис дода шуда, бонувони чирадаст дар ҷамъомадҳои тантанавӣ бо онҳо сарфароз гардонида мешаванд. Ҳамзамон соли гузашта дар вилоят ҷиҳати эҳё ва тарғибу ташвиқи ҳунарҳои мардумӣ Барномаи вилоятии «Рушди ҳунарҳои мардумӣ» низ қабул гардидааст.

Инчунин то имрӯз дар шаҳру ноҳияҳои вилояти Суғд, аз ҷумла маркази он- шаҳри Хуҷанд, ки бо ҳунармандони худ шуҳратёб гардидааст, бо чанде аз маҳаллаҳои ҳунармандон, аз қабили сандуқсозон, заргарон, гаҳворасозон, кулолгарон, мӯҳрабофону сабадбофон, читгарону қаннодон маъруф буда, инчунин омӯзиши ҳунарҳои дигари дастӣ ва меҳнати хонагӣ, чун қолинбофӣ, кешбофӣ, атласу адрасбофӣ, сӯзанидӯзӣ, қуроқдӯзӣ, тоқидӯзӣ, косибӣ ва ғайра низ дар марказҳои амалкунандаи ҳунаромӯзӣ дар сатҳи хуб ба роҳ монда шудаанд.