Дар Чин Ёддошти тафоҳум «Оид ба Механизми ҳамкорӣ дар соҳаи маъмурикунонии андоз дар доираи ташаббуси «Як камарбанд – як роҳ» ба имзо расид

ДУШАНБЕ, 18.04.2019 /АМИТ «Ховар»/. Субҳи имрӯз, 18 апрели соли 2019 дар Ҷумҳурии Мардумии Чин  нахустин Форуми ҳамкорӣ дар соҳаи маъмурикунонии андоз дар доираи ташаббуси «Як камарбанд – як роҳ» баргузор гардид. Дар доираи Форуми мазкур Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода Ёддошт «Оид ба Механизми ҳамкорӣ дар соҳаи маъмурикунонии андоз дар доираи ташаббуси «Як камарбанд – як роҳ»-ро аз номи Ҳукумати Ҷумҳурии Тоҷикистон ба имзо расонид.

Дар ин бора ба АМИТ «Ховар» аз Кумитаи андоз хабар доданд.

Зикр шуд, ки дар Форум намояндагони мақомоти андоз – аъзои Механизми ҳамкорӣ дар соҳаи маъмурикунонии андоз, дар маҷмӯъ намояндагони зиёда аз 65 давлат, мансабдорони воломақоми Ҳукумати Ҷумҳурии Мардумии Чин, намояндагон аз Созмони Иқтисодии Ҳамкорӣ ва Рушд, Хазинаи Байналмилаии Асъор, Гурӯҳи Бонки ҷаҳонӣ ва дигар созмонҳои байналмилалӣ, доираҳои илмӣ ва ширкатҳои фаромиллӣ иштирок намуданд.

Механизм ба ташкили ҳамкорӣ дар соҳаи хизматрасонӣ дар самти андозбандӣ, танзими баҳсҳои андозӣ, мукаммалнамоии маъмурикунонӣ бо ёрии мубодилаи таҷрибаи мутақобилаи маъмурикунонии андоз ва шароити мусоид барои дурустии маблағҳои ҳисобшудаи андозҳо, ҳамчунин мубориза дар самти рӯйпӯш намудани манбаи андозбандӣ ва фоидаи андозбандишаванда (нақшаи BEPS), амалигардонии мубодилаи автоматии маълумоти молиявӣ (AEOI) мутобиқ ба стандартҳои байналмилалӣ равона карда шудааст.