ДАРАХТ БИНШОН! Ба пешвози 30- солагии Истиқлолият дар ноҳияи Тоҷикобод маъракаи ниҳолшинонӣ ҷараён дорад

ТОҶИКОБОД, 09.04.2019 /АМИТ «Ховар»/. Бо ташаббуси мақомоти иҷроияи ҳокимияти давлатии ноҳияи Тоҷикобод дар ҳудуди  ҷамоатҳои ноҳия ҳашарҳои дастаҷамъона ташкил гардида истодаанд. Аз сабаби дер омадани фасли баҳор дар ноҳия мардум ба воситаи   ҳашарҳои умумӣ  ба пешвози баҳори нозанин ва истиқболи ҷашни 30-солагии Истиқлолияти давлатии Ҷумҳурии Тоҷикистон кӯчаю хиёбонҳо,  атрофи корхонаю ташкилот ва деҳаҳоро тозаю озода намуда, дар канори роҳҳо ниҳолҳои сояафкан ва  ороишӣ  мешинонанд.

Дар боғи фарҳангию фароғатии маркази ноҳия чунин як ҳашари дастаҷамъона  ташкил гардид, ки зимни он дар канори роҳравҳо  200 дона ниҳолҳои ороишӣ, аз қабили арчаю  санавбар  ва дар атрофи боғ 100 дона ниҳолҳои сояафкан шинонида шуданд.

Тибқи иттилои масъулини бахши ҳифзи муҳити зисти ноҳияи Тоҷикобод, то имрӯз сокинони ноҳия 8000 бех дарахт шинондаанд, ки аз он 2000 бех дарахтони мевадиҳанда мебошанд.

То охири фасли баҳор сокинони ноҳия 14 ҳазор бех дарахтони сояафкану  мевадиҳанда мешинонанд. Дар назар аст, ки  дар ноҳия дар 24 гектар боғи нав бунёд гардад, ки аз он 3 гектараш боғи интенсивӣ мебошад.