«ИЛМУ МАОРИФ – БУНЁДИ МАЪРИФАТИ ЗЕҲНӢ». Таҳти ин унвон дар Душанбе конференсияи илмию амалӣ доир гардид

ДУШАНБЕ, 18.04.2019/АМИТ «Ховар»/. Рушди соҳаи маориф заминаи асосии пешрафту шукуфоии ҳар давлат ба шумор рафта, он дар меҳвари сиёсати иҷтимоии Ҳукумати  Ҷумҳурии Тоҷикистон қарор дорад. Ин матлаб дар конфронси илмию амалӣ, ки имрӯз дар Душанбе дар мавзӯи «Илму маориф –бунёди маърифати зеҳнӣ» доир шуд, баён гардид.

Хабарнигори АМИТ «Ховар» иттилоъ медиҳад, ки дар ҳамоиш  мушовири бахши Ёрдамчии Президенти Ҷумҳурии Тоҷикистон оид ба масъалаҳои иҷтимоӣ ва робита бо ҷомеа  Масрур Абдуллозода,  директори Маркази тадқиқоти стратегии назди Президенти Ҷумҳурии Тоҷикистон Диловар Қодирзода, раиси Кумитаи Маҷлиси намояндагон оид ба илм, маориф, фарҳанг ва сиёсати ҷавонон  Лутфия Раҷабова доир ба самтҳои афзалиятноки сиёсати Ҳукумати Ҷумҳурии Тоҷикистон дар бахши маориф, рушди соҳаи маориф дар кишвар  ва асосҳои ҳуқуқии  он сухан гуфтанд.

Зикр шуд, ки тақвияти иқтидори илмии кишвар, ҷорӣ кардани ихтироот дар истеҳсолот, устувор гардонидани пояҳои моддиву техникии муассисаҳои таълимӣ, баланд бардоштани сифати таълим дар ҳамаи зинаҳои таҳсилот, ҷалби боз ҳам васеи истеъдодҳои ҷавон ба омӯзиши технологияҳои муосир ва корҳои эҷодиву техникӣ вазифаи муҳимтарини соҳаҳои илму маориф маҳсуб мешаванд.

Гуфта шуд, ки ҷиҳати рушди соҳаи маорифи мамлакат аз ҷониби Парлумони кишвар чандин қонунҳои соҳавӣ, аз қабили  қонунҳои Ҷумҳурии Тоҷикистон «Дар бораи маориф», «Дар бораи таҳсилоти ибтидоии касбӣ», «Дар бораи таҳсиоти миёнаи касбӣ», «Дар бораи таҳсилоти олии касбӣ ва таҳсилоти касбии бад аз муассисаи олии таълимӣ», «Дар бораи таҳсилоти иловагӣ», «Дар бораи адабиёти таълимӣ», «Дар бораи  забони давлатии Ҷумҳурии Тоҷикистон», «Дар бораи фаъолияти инноватсионӣ», «Дар бораи парки технологӣ», «Дар бораи экспертизаи илмӣ ва илмӣ-техникӣ»  қабул гардидаанд, соҳаро ба танзим медароранд.  

Мусаллам аст, ки дар зарфи солҳои Истиқлолияти давлатӣ дар мамлакат ба рушди соҳаи илму маориф аз ҷониби Ҳукумати Ҷумҳурии Тоҷикистон  таваҷҷуҳи хоса зоҳир гардида,  сол аз сол маблағгузорӣ ба соҳаи маориф меафзояд. Дар мамлакат садҳо муассисаҳои таълимӣ  бунёд гардидаанд, ки ин раванд ба баланд бардоштани сатҳу сифати таълиму тарбия  дар муассисаҳои томактабӣ, таҳсилоти умумӣ, касбӣ ва олӣ  мусоидат менамояд. Таъкид гардид, ки бояд дар ҷумҳурӣ мутахассисоне омода гарданд, ки ҷавобгӯи  талаботи бозори меҳнат бошанд ва дар  ин росто низоми соҳаи маорифи мамлакатро бояд ба стандартҳои ҷаҳонӣ мутобиқ намуд. Ин дар ҳолест, ки дар Стратегияи  миллии рушди Ҷумҳурии Тоҷикистон барои то соли 2030  соҳаи маориф яке аз соҳаҳои  афзалиятнок ва калидии рушди устувори  мамлакат арзёбӣ гардидааст.

Дар ҳамоиш ҳамзамон доир  ба дигар паҳлуҳои рушди соҳаи маориф, мушкилоти ҷойдоштаи соҳа, дурнамои  он ва нақши соҳаи маориф дар таҳкими пояҳои давлатдории  миллӣ ва пешрафту шукуфоии кишварамон табодули назар намуда, пешниҳодҳои судманд баён карданд.

Дар ҷараёни ҳамоиш ҳамзамон ду китоб- «Таҳаввулоти низоми маориф дар Тоҷикистон» ва «Илм маориф», ки  бозгӯкунандаи тамоюлот, мушкилот ва дурнамои соҳаи маорифи кишвар мебошанд, рӯнамоӣ гариданд.