Муовини Раиси Маҷлиси намояндагон бо роҳбари барномаи рушди нерӯи инсонии Бонки ҷаҳонӣ дар Осиёи Миёна мулоқот анҷом дод

ДУШАНБЕ, 26.04.2019. /АМИТ «Ховар»/. Дар Душанбе вазъи кунунӣ ва дурнамои ҳамкории молиявию иқтисодии Тоҷикистон бо Бонки ҷаҳонӣ  мавриди баррасӣ қарор дода шуд.

Имрӯз муовини Раиси Маҷлиси намояндагони Маҷлиси Олии Ҷумҳурии Тоҷикистон Хаӣринисо Юсуфӣ бо  роҳбари барномаи рушди нерӯи инсонии Бонки ҷаҳонӣ дар Осиёи Миёна Сузанна  Хайрапетян мулоқот анҷом дод.

Тавре котиби матбуотии Маҷлиси намояндагон Муҳаммадато Султонов ба мухбири АМИТ «Ховар» иттилоъ дод, дар мулоқот масоили вобаста ба муносиботи дӯстӣ ва ҳамкории судбахши Тоҷикистон бо Бонки ҷаҳонӣ  муҳокима гардид.

Зикр гардид, ки Ҳукумати Ҷумҳурии Тоҷикистон дар ҳамдастӣ бо ташкилоту идораҳои молиявии байналмилалӣ, аз ҷумла,  Бонки ҷаҳонӣ дар татбиқи сиёсати иқтисодӣ ба нишондиҳандаҳои назаррас ноил гардид.

«Хайриниссо Юсуфӣ аз тадбирҳои андешидаи Ҳукумати мамлакат  дар самти паст кардани шиддати таъсири омилҳои берунӣ ба иқтисодиёт ва тақвият бахшидани рақобатпазирии иқтисоди миллӣ ёдовар шуд. Изҳори боварӣ карда шуд, ки дар оянда низ шарикони рушди Тоҷикистон дар доираи афзалиятҳои стратегии худ бо дастгирии  соҳаҳои иҷтимоӣ дар ҳалли мушкилоти мавҷудаи иқтисодию молиявӣ нақши муносиб мегузоранд», — иттилоъ дод манбаъ.

Ёдовар мешавем, ки ҷонибҳо оид ба вазъи иҷтимоию иқтисодии мамлакат ва ҳифзу ҳимояи кӯдакон дар қонунгузориҳои Тоҷикистон ибрози андеша намуданд.