Рустами Эмомалӣ бахшида Рӯзи пойтахти Ҷумҳурии Тоҷикистон–шаҳри Душанбе як зумра қарорҳоро ба имзо расонид

ДУШАНБЕ, 12.04.19. /АМИТ «Ховар»/. Раиси шаҳри Душанбе Рустами Эмомалӣ  11 апрели соли равон дар арафаи таҷлили  Рӯзи пойтахти Ҷумҳурии Тоҷикистон –шаҳри Душанбе  ва бо мақсади дар сатҳи баланди ташкилию ғоявӣ баргузор гардидани он  як  қатор қарорҳо ба имзо расонид. Аз ҷумла, қарорҳо дар бораи ҳавасмандгардонии ғолибони озмунҳои   «Мураббии сол», «Хонандаи сол» дар шаҳри Душанбе, инчунин қарор дар бораи  тасдиқи  Низомномаи тартиби гузаронидани озмуни соҳаи маорифи шаҳри Душанбе — «Беҳтарин муассисаи таълимӣ дар самти корҳои ободонӣ» ба тасвиб расонида шуданд.

Тавре  аз Раёсати  иттилоот  ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, ин иқдомот  бо мақсади ҳавасмандгардонии хонандагони муассисаҳои таълимӣ  ҷиҳати таҳсили хубу аъло,  омӯзгорону мураббияҳо дар таълиму тарбия, инчунин саҳми кормандони соҳаи маориф  дар самти тарғибу ташвиқи корҳои созандагӣ, ободонӣ, сабзкорӣ ва бо гулу буттаҳо ороиш додани муҳити муассисаҳои таҳсилоти миёнаи умумии   пойтахт роҳандозӣ мегардад.

Тибқи қарори дахлдори  Раиси шаҳр Сарраёсати молияи шаҳри Душанбе вазифадор  гардидааст, ки   ба Сарраёсати маорифи шаҳри Душанбе барои сарфароз гардонидани ғолибони озмунҳои  «Мураббии сол» ва «Хонандаи сол»  8 000 (ҳашт ҳазор) сомонӣ ҷудо намояд.