«Саҳми ман дар шаҳри ман»-таҳти чунин унвон дар Душанбе ҳамоиши умумишаҳрии ҷавонон баргузор гардид

ДУШАНБЕ, 16.04.2019 /АМИТ «Ховар»/.  13-14 апрели соли равон бахшида ба Рӯзи пойтахти Ҷумҳурии Тоҷикистон дар ҳудуди шаҳри Душанбе ҳамоиши умумишаҳрии ҷавонон таҳти унвони «Саҳми ман дар шаҳри ман» баргузор гардид.

Тавре корманди Раёсати кор бо ҷавонон ва варзиши шаҳри Душанбе  Маҳкамбой Гулов ба АМИТ  «Ховар» хабар дод, иқдоми мазкур дар доираи қарори Раиси шаҳри Душанбе аз 1 апрели соли 2019 «Дар бораи таҷлили Рӯзи пойтахти Ҷумҳурии Тоҷикистон-шаҳри Душанбе» ба нақша гирифта шудааст. Мақсад аз роҳандозӣ намудани ҳамоиши мазкур  тозаву озода намудани шаҳри Душанбе ва дар сатҳи баланду зарурӣ баргузор намудани Рӯзи пойтахти Ҷумҳурии Тоҷикистон мебошад.

Ба иттилои манбаъ, ҳамоиши умумишаҳрии ҷавонон бо ибтикори Раёсати кор бо ҷавонон ва варзиши шаҳри Душанбе ва бахшҳои ноҳиявии он ба роҳ монда шуд. Дар он  кормандони ҷавони ташкилоту муассисаҳо, донишҷӯёни донишгоҳу донишкадаҳо, намояндагони  соҳаи тандурустӣ, фарҳанг, маориф, варзиш, истиқоматкунандагони хобгоҳҳо иштирок намуда, кӯчаву гулгашт, боғҳо, каналу ҷӯйбор, майдончаҳои варзишӣ, муассисаҳои таълимӣ, бемористон ва оромгоҳҳои ҳудуди шаҳри Душанберо тоза намуданд.

Иқдоми мазкур ба хотири тарбияи хуб, рӯ овардани ҷавонон ба корҳои созандагиву бунёдкорӣ, расидан ба қадри моликияти ҷамъиятӣ ва татбиқи муқаррароти Маромномаи сокини пойтахт  гузаронида шуда, тайи  ду рӯз дар он  беш аз 25 ҳазор нафар наврасону ҷавонон фаъолона ширкат намуданд.