Тоҷикистону Россия ҳамкорӣ дар самти кор бо ҷавононро тақвият медиҳанд

ДУШАНБЕ, 16.04.2019. /АМИТ «Ховар»/. Нимаи дуюми рӯзи 15 апрел дар доираи баргузории Форуми ҷавонони Россия ва Тоҷикистон дар шаҳри Москваи Федератсияи Россия мулоқоти раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода бо директори Агентии федералии кор бо ҷавонони Федератсияи Россия Александр Бугаев баргузор гардид. Дар ин бора ба АМИТ «Ховар» аз Кумитаи ҷавонон ва варзиш хабар доданд.

Александр Бугаев ҳайати намояндагии Ҷумҳурии Тоҷикистонро барои ташриф ба Федератсияи Россия хайрамақдам гуфта, аз ҳамкории дуҷониба дар самти кор бо ҷавонон дар доираи сиёсати дурандешонаи роҳбарони давлатҳои ҳарду кишвар изҳори хушнудӣ намуд.

Зимни мулоқот зикр гардид, ки ҳамкории муштаракаи Ҷумҳурии Тоҷикистон ва Федератсияи Россия дар самти татбиқи сиёсати давлатии ҷавонон хуб ба роҳ монда шуда, Форуми ҷавонони Россияву Тоҷикистон, ки дар Федератсияи Россия баргузор гардида истодааст, намунаи волои ин гуфтаҳост.

Ҷонибҳо барои густариши ҳамкории мутақобилан судманд ва баргузории чорабиниҳои гуногуни муштарак ибрози назар намуданд.