Ҳамсари Президенти Туркия дар Душанбе Маркази тавонбахшии маъюбонро ифтитоҳ намуд

Июнь 15, 2019 13:18

ДУШАНБЕ, 15.06.2019. /АМИТ «Ховар»/. Имрӯз дар шаҳри Душанбе аз ҷониби Сарраёсати агентии туркӣ оид ба ҳамкорӣ ва ҳамоҳангсозӣ (ТИКА) дар ҳудуди калонтарин беморхонаи  мамлакат — Муассисаи давлатии Маркази миллии тиббии «Шифобахш» Маркази тавонбахшии маъюбон  мавриди баҳрабардорӣ қарор дода шуд. Дар маросими  кушодашавии ин муассисаи тиббӣ хонум Эмине Эрдоған, ҳамсари Президенти Туркия Реҷеп Тайип Эрдуғон иштирок намуд.

Тавре мухбири АМИТ «Ховар» Зарангези ЛАТИФ хабар медиҳад, дар маросими мазкур Хонум Эмине Эрдоған зикр намуд, ки бунёди ин марказ қадами устувор дар рушди робитаҳои дӯстии ду кишвари ҳамҷавор хоҳад буд. Номбурда ҳамчунин  гуфт, ки «итминон дорам, ки ин марказ барои шахсони имконияташон маҳдуд василаи хуби табобат гардида, дар ҳаёти онҳо дигаргуниҳои куллиро   ба миён меорад».  Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода зикр кард, ки дар  ин марказ  физиотерапевтҳо ва эрготерапевтҳои касбӣ, ки дар самти тавонбахшии маъюбон дар хориҷи кишвар таълим гирифтаанд, ба кор ҷалб карда мешаванд.

Мавриди зикр аст, ки лоиҳаи бунёди Марказ дар ду марҳила амалӣ гардид. Дар марҳилаи якуми он бинои якошёна бо майдони 300 метри мураббаъ дар ҳудуди муайяннамудаи роҳбарони беморхона сохта шуд. Дар марҳилаи дуюми лоиҳа Маркази мазкур  бо таҷҳизоту дастгоҳҳои зарурии  тиббӣ барои тавонбахшии маъюбон муҷаҳҳаз гардид.

Дар Маркази  мазкур имконият фароҳам оварда шудааст, ки дар  баробари расонидани хизмати тиббӣ ба шахсони имконияташон маҳдуд, ҳамзамон табобати баъдиҷарроҳии беморони шуъбаи ортопедии Маркази миллии тиббӣ гузаронида шавад.

Лозим ба ёдоварист, ки ТИКА аз соли 1995 ин ҷониб дар Ҷумҳурии Тоҷикистон фаъолият намуда, то имрӯз дар самтҳои маориф, тандурустӣ, кишоварзӣ, таҳкими идораҳои марказӣ ва маҳаллӣ, кӯмаки башардӯстона ва ғайра зиёда аз 300 лоиҳаро  амалӣ гардонидааст.

Ёдовар мешавем, ки  имрӯз Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қабл аз баргузории Самити панҷуми Машварати ҳамкорӣ ва тадбирҳои боварӣ дар Осиё бо Президенти Ҷумҳурии Туркия Реҷеп Тайип Эрдоган мулоқот карданд. Зимни мулоқот ҷонибҳо масоили гуногуни робитаҳои ҳамкоририи ду кишварро мавраиди баррасии амиқ қарор дода, ҳавасмандии худро барои рушди робитаҳои мутақобилан судманди ояндадори ду кишвар иброз доштанд.

Дар ҷараёни мулоқот Пешвои миллат, муҳтарам Эмомалӣ Раҳмон аз Президенти Ҷумҳурии Туркия Реҷеп Тайип Эрдоган даъват ба амал оварданд, ки бо сафари расмӣ ба Тоҷикистон ташриф оранд.

Бояд илова кард, ки Хонум Эмине Эрдоған Президенти Ҷумҳурии Туркия муҳтарам Реҷеп Таййип Эрдоғанро, ки бо мақсади иштирок  дар  панҷумин Саммити сарони кишварҳои узви Машварати ҳамкорӣ ва тадбирҳои боварӣ дар Осиё (МҲТБО) ба  шаҳри Душанбе  ташриф овардааст,  ҳамроҳӣ менамояд.       

Июнь 15, 2019 13:18

Хабарҳои дигари ин бахш

Дар Тоҷикистон тайи 15 соли татбиқи қонуни танзим беш аз 25 миллиард сомонӣ ба нафъи шаҳрвандон пасандоз гардидааст
Дар Суғд барои қадршиносии иштирокчиёну маъюбони ҶДҶ 477 ҳазор сомонӣ ҷудо гардид
НА ҲАМА ЧИРО ЯКБОРА ИСТЕЪМОЛ КАРДАН МУМКИН АСТ. Ғизошиноси тоҷик роҳи дурусти баромадан аз рӯзадории моҳи Рамазонро гуфт
Доир ба нақши худидоракунии маҳаллӣ дар таъмини рушди устувори Тоҷикистон конференсияи ҷумҳуриявӣ доир шуд
Раиси Шӯрои уламо Саидмукаррам Абдуқодирзода аз мардуми Тоҷикистон даъват кард, ки дар иди Фитр ба исрофкорӣ роҳ надиҳанд
Дар Конибодом корҳои сохтмонии бинои маъмурии ҲХДТ ва навсозии Боғи фарҳангию фароғатии шаҳр идома доранд
Бори нахуст дар Тоҷикистон ҷарроҳии эзофагоколопластика бо колофарингоанастамоз анҷом дода шуд
Бахшида ба Рӯзи умумиҷаҳонии ҳифзи меҳнат дар Душанбе ҳамоиш доир гардид
ДАР ПАРТАВИ ҲИДОЯТҲОИ ПЕШВОИ МИЛЛАТ. Дар Тоҷикистон ба 300 оила кумаки башардӯстона расонида шуд
Сокинони деҳаи Гожаки ноҳияи Шуғнон соҳиби нуқтаи оби тозаи нӯшокӣ шуданд
БРИТАНИЯИ КАБИР БА ҶАЛБИ ҚУВВАИ КОРӢ АЗ ТОҶИКИСТОН ОМОДА АСТ. Имсол 500 нафар шаҳрвандони Тоҷикистон ба Британияи Кабир сафарбар мегарданд
Дар Агентии хизмати давлатӣ масъалаи пардохти музди меҳнати хизматчиён ҳангоми таҳсил баррасӣ гардид