Дар Душанбе намоиши инфиродии аксбардори шинохтаи Тоҷикистон Заур Дахте оғоз гардид

Июль 6, 2019 11:00

ДУШАНБЕ, 06.07.2019. /АМИТ «Ховар»/. Бо дастгирии Вазорати фарҳанг ва Иттифоқи суратгирони Тоҷикистон имрӯз дар Осорхонаи миллии Тоҷикистон намоиши инфиродии аксбардори шинохтаи Тоҷикистон Заур Дахте бо  номи  «Уфуқҳои дӯстӣ» оғоз ёфт. Намоиш бахшида ба 30-солагии Истиқлолияти давлатии Ҷумҳурии Тоҷикистон роҳандозӣ гардидааст.

Тавре мухбири АМИТ «Ховар» иттилоъ медиҳад, дар маросими ифтитоҳи намоиши мазкур намояндагони Дастгоҳи иҷроияи Президенти Ҷумҳурии Тоҷикистон, Вазорати фарҳанги Ҷумҳурии Тоҷикистон, корпусҳои дипломатии муқими шаҳри Душанбе, Академияи илмҳои Ҷумҳурии Тоҷикистон, иттифоқҳои эҷодӣ ва ҳаводорони ҳунари аксбардори маъруф Заур Дахте иштирок намуданд.

«Дар ҳақиқат Заур Дахте фарзанди ду халқ мебошад. Он кас дар Ҷумҳурии Доғистон ба дунё омада, 70 сол аст, ки дар мамлакати мо зиндагӣ мекунанд.   Заур Дахте дар рушди фарҳангу санъати тоҷик саҳми назаррас гузошта,  имрӯз на танҳо дар дохил, балки дар хориҷи мамлакат шуҳратёр гардидаанд. Аз ин хотир баргузории намоиши имрӯза хеле меҳим мебошад»,-иброз дошт мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Масрур Абдуллозода зимни ифтитоҳи намоиш.

Аксҳои ба намоиш пешниҳодшуда бори дигар собит сохтанд, ки Тоҷикистон мамлакати зебо буда, бо табиати дилфиреб, гулу буттаҳои диққатҷалбкунанда, гиёҳҳои шифобахш ва обҳои мусаффои хеш дили садҳо нафар сайёҳонро ба худ ҷалб мекунад.

Бояд зикр намуд, ки дар аксҳои суратгири маъруф дар баробари нишон додани зебоиҳои диёр, инчунин соҳаҳои муҳими ҳаёт, аз қабили сиёсат, иқтисод ва фарҳанг инъикос ёфтаанд.

Ҳамчунин дар намоиш аксҳо аз ҷараёни барномаҳои фарҳангӣ, олами кӯдакон ва дигар лаҳзаҳои ҷолиби ҳаёти тоҷикон пешкаши ҳозирин гардонида мешаванд.

Заур Дахте бо суратҳои гирифтаи худ мехоҳад зебоиҳои мамлакатро ба дигар халқу миллатҳо ва сайёҳони хориҷӣ нишон диҳад, то онҳо аз табиати нотакрори Тоҷикистон ҳаловат баранд.

Мавриди зикр аст, ки Заур Дахте яке аз наворбардоронии маъруф, суратгири мусаввир, Ходими хизматнишондодаи фарҳанги Тоҷикистон, академики Академияи мусаввирии Тоҷикистон, профессори Донишгоҳи байналмилалии таълими бунёдӣ, Лауреати кинофестивалҳои байналмилалӣ мебошад. Ӯ соли 1936 дар Доғистон таваллуд шуда, тўли беш аз 60 сол аст, ки дар шаҳри Душанбе зиндагӣ мекунад.

Заур Дахте дар таҳияи зиёда аз 600 филм ширкат кардааст. Ду филми ҷолиби ў ба маликаи балети тоҷику шўравӣ Малика Собирова бахшида шудаанд. Филми «Малика» сазовори Ҷоизаи Кинофестивали ҷумҳуриҳои Осиёи Марказӣ гардида буд. Баъди вафоти балерина Заур Дахте соли 1982 филми «Маликаи мо»-ро сохт.

Филмҳои олии Заур Дахте оид ба сарнавишту саргузашти шоирони бузурги форсу тоҷик: Абулқосим Лоҳутӣ, Мирзо Турсунзода, Боқӣ Раҳимзода, Ҳофизи Шерозӣ ва Абдураҳмони Ҷомӣ ба хазинаи тиллоии кинои миллӣ ворид шудаанд.

Завқи эҷодии Заур гуногунҷабҳа аст, вале суратгирӣ яке аз шуғлҳои деринаи ў буда, тайи 20 соли охир он дар фаъолияти эҷодиаш хеле мукаммал зуҳур кардааст. Тамоми аксҳои гирифтааш саршори рангҳову гармиянд. Онҳоро метавон беохир тамошо кард. Дар сукунати он аксҳо эҳсосу андешаҳо амиқ инъикос гардидаанд. Сукунате дар ҳаракат… Ин қонунист, вақте ки суратро наворбардори кино мегирад. Наворбардори одӣ не, балки яке аз беҳтаринҳо дар кинои тоҷик …

Аваллин намоиши аксҳои гирифтаи Заур Рустамович Дахте соли 2003 дар Душанбе доир гашта буд. Баъдтар намоишҳои инфиродиаш дар Чин, Ҳиндустон, Япония, Россия, ИМА, Франсия, Эрон, Германия, Қазоқистон, Озарбойҷон, Туркманистон, Беларус, Ўзбекистон ва Қирғизистон баргузор шудаанд.

Июль 6, 2019 11:00

Хабарҳои дигари ин бахш

БА ПЕШВОЗИ РӮЗИ ҶАВОНОН. Дар Донишкадаи давлатии санъати тасвирӣ ва дизайни Тоҷикистон ҳамоиш доир гардид
ОСОРХОНАҲО – ВОСИТАИ МУҲИМИ ТАБОДУЛИ ФАРҲАНГӢ. Дар Муассисаи нашриявии «Ирфон» ҳамоиш доир шуд
ИМРӮЗ — РӮЗИ БАЙНАЛМИЛАЛИИ ОСОРХОНАҲО. Солиёни зиёд зарур аст, ки як осорхона шуҳрати ҷаҳонӣ пайдо намояд
«МАЛИКА: ДИРӮЗ, ИМРӮЗ ВА ҲАМЕША». Ба ифтихори 80-солагии ситораи нотакрори балети тоҷик Малика Собирова барномаи фарҳангӣ доир мешавад
«ДИЛ БА ФАРМОНИ ВАТАН, ХУРСАНДАМ!». Ёддоштҳои Нависандаи халқии Тоҷикистон Абдулҳамид Самад дар бораи устод Мирсаид Миршакар
Дар ноҳияи Сангвор Рӯзи байналмилалии оила ва Фестивали ҷумҳуриявии «Сад ранги чакан» доир гардид
Дар Душанбе бахшида ба фановарӣ ва эҷодкорӣ Ҷашвораи минтақавии «Go Viral» баргузор мешавад
«ПАЙКАРИ МИЛЛАТ». Таҳти ин ном дар Театри академии драмавии ба номи Лоҳутӣ намоишномаи нав рӯи саҳна омад
«ДӮСТӢ — ТАВАССУТИ ФАРҲАНГ». Таҳти ин унвон дар Донишгоҳи Ҳоҷатепеи шаҳри Анқара бо иштироки кормандони Сафорати Тоҷикистон ҳамоиш доир шуд
Дар вилояти Хатлон Рӯзи шашмақом — достони муҳташами савту калом бо шаҳомати хосса таҷлил шуд
Дар донишгоҳҳои Туркия фарҳанги бойи Тоҷикистон ба хориҷиён муаррифӣ шуд
ШАШМАҚОМ НУТҚИ ҲУНАРМАНДРО БУРРО ВА МАЪНАВИЁТРО ҒАНӢ МЕГАРДОНАД. Имрӯз дар Тоҷикистон рӯзи шоҳасари мусиқии суннатии тоҷикон таҷлил мешавад