Наим Набизода: «Ҳолати популятсияи намудҳои асосии ҳайвоноти ваҳшӣ мӯьтадил буда, саршумор дар ҳоли афзоиш аст»

ДУШАНБЕ, 23.07.2019 /АМИТ «Ховар»/.  Тибқи нақшаи корӣ, Агентии хоҷагии ҷангал дар якҷоягӣ бо мутахассисони Академияи илмҳои Ҷумҳурии Тоҷикистон ва Кумитаи ҳифзи муҳити зисти назди Ҳукумати Ҷумҳурии Тоҷикистон  моҳҳои феврал- марти соли равон дар мавзеъҳои асосии ҳудуди заминҳои фонди давлатии ҷангал ва шикоргоҳҳои хоҷагиҳои шикорӣ маъракаи баҳисобгирии ҳайвоноти ваҳшӣ  гузаронид. Аз натиҷаи таҳлил муайян гардид, ки  ҳолати популятсияи намудҳои асосии ҳайвоноти ваҳшӣ, махсусан  сумдорон мӯьтадил буда, саршуморашон дар ҳоли афзоиш аст. Ин нуктаро муовини директори Агентии хоҷагии ҷангали назди Ҳукумати Ҷумҳурии Тоҷикистон Наим НАБИЗОДА    зимни нишасти матбуотӣ иброз намуд.

Бино ба зикри номбурда, ҷиҳати мубориза бар зидди хукҳои ваҳшӣ ва гург, ки ба соҳаи хоҷагии халқ дар навоҳии кӯҳистон зарар мерасонанд, тибқи тартиботи муқарраргардида барои шикор кардан роҳхатҳои шикорӣ муайян карда шуд. Ҳоло  маблағи аз ҳисоби истифодаи захираҳои шикор ба дастомада  41 ҳазору 200 сомониро ташкил медиҳад.

-Баҳри  пешгирӣ намудани қонунвайронкуниҳо дар самти шикор дар ҳудуди хоҷагиҳои ҷангал пайваста амалиёт гузаронида мешавад.  То  имрӯз 65 ҳолати қонунвайронкуниҳои шикор ошкор  гардида, маблағи ҷарима ва зарари ба фонди шикор расонидашуда пурра барқарор карда шудааст, — гуфт Наим Набизода.