Тоҷикистон ва Қазоқистон солҳои оянда гардиши молро ба 2 миллиард доллар расонданианд

Июль 18, 2019 17:54

ДУШАНБЕ, 18.07.2019/АМИТ «Ховар»/. Ҳукуматҳои ҷумҳуриҳои Тоҷикистон ва Қазоқистон тасмим гирифтаанд, ки дар се –чор соли оянда гардиши молро байни ду давлат ба ду миллиард доллар расонанд. Табодули  мол байни Ҷумҳурии Тоҷикистон ва Ҷумҳурии Қазоқистон  соли гузашта 8,2 % афзоиш ёфта,  900 миллион доллари амрикоиро ташкил дод. Ҳаҷми интиқоли бор тавассути нақлиёти автомобилӣ  байни ду давлат 2,9 баробар афзуда, марзи беш аз 16 миллион тоннаро убур намуд.

Ин нишондоди оморӣ дар ҳолест, ки имрӯз дар шаҳри Душанбе ҷаласаи дуюми Шӯрои кории Тоҷикистону Қазоқистон баргузор гардид. Дар кори  он роҳбарону намояндагони вазорату идораҳои марбутаи мамлакат, доираҳои соҳибкорӣ ва намояндагони корхонаю ширкатҳои тавлидотии Тоҷикистону Қазоқистон иштирок намуданд.

Раиси Палатаи савдо  ва саноати Ҷумҳурии Тоҷикистон Ҷамшед Ҷумъахонзода, Сафири Фавқулода ва Мухтори  Ҷумҳурии Қазоқистон дар Ҷумҳурии Тоҷикистон Аскар Тоҷибоев ва   раиси Раёсати Палатаи савдои хориҷии Ҷумҳурии Қазоқистон   Аян Еренов  доир ба тавсеаи ҳамкории мутақобилан судманди иқтисодию тиҷоратии Ҷумҳурии Тоҷикистон ва Ҷумҳурии Қазоқистон ибрози назар намуда, баргузории ҷаласаи дуюми Шӯрои кории Тоҷикистону Қазоқистонро дар шаҳри Душанбе қадами ҷиддӣ дар самти тақвияти робитаҳои иқтисодию тиҷоратии ҳар ду давлат  маънидод карданд.

Дар ҷаласаи дуюми Шӯрои кории Тоҷикистону Қазоқистон масъалаҳои марбут ба густариши робитаҳои иқтисодию тиҷоратӣ, ҷалби сармоя ба соҳаҳои афзалиятноки иқтисоди Тоҷикистон, ташкили корхонаҳои муштараки истеҳсолӣ ва тавсеаи робитаҳои доираҳои соҳибкории Тоҷикистону Қазоқистон  баррасӣ гардиданд. Инчунин иштирокдорони ҷаласаи дуюми Шӯрои кории Тоҷикистону Қазоқистон ҷалби сармояи мустақими Қазоқистон ба иқтисодиёти Тоҷикистон, таҳкими равобити мустақими доираҳои соҳибкорию тиҷоратии  ду давлат, таъсиси марказҳои тақсимоти яклухт барои коркард, нигоҳдорӣ ва интиқоли маҳсулоти кишоварзии Тоҷикистон  бо назардошти содирот ба бозорҳои Қазоқистон, бунёди корхонаҳои муштараки коркарди ғалла ва содироти маҳсулоти он ба хориҷи мамлакатро аз самтҳои афзалиятнок ва ояндадори ҳамкории Тоҷикистон ва Қазоқистон арзёбӣ намуданд.

Дар ҷаласаи дуюми Шӯрои кории Тоҷикистон ва Қазоқистон  беш аз 20 ширкату корхонаҳои  тавлидотӣ  соҳаҳои  хӯрокворӣ, мошинсозӣ, масолеҳи сохтмонӣ, металлургия, кимиё, кишоварзӣ, тиб, фармасевтикаи Қазоқистон  намояндагӣ карданд. Дар ҷараёни ҷаласаи Шӯрои  кории Тоҷикистону Қазоқистон инчунин имконият ва зарфиятҳои иқтисодию тиҷоратӣ ва сармоягузории  ҳар ду давлат муаррифӣ гардиданд.

Дар доираи ҷаласаи дуюми Шӯрои кории Тоҷикистону Қазоқистон вохӯрии соҳибкорон ва доираҳои тиҷоратии Тоҷикистону Қазоқистон дар шакли B2B доир гардида, қарордҳои ҳамкорӣ байни ширкатҳои  тавлидотии Тоҷикистон ва Қазоқистон ба имзо расонида шуданд.

Бояд тазаккур дод, ки чанде қабл дар доираи сафари расмии  Сарвазири Ҷумҳурии Қазоқистон Аскар Мамин ба Ҷумҳурии Тоҷикистон беш аз 10 санад ба имзо расонида шуд, ки онҳо ба таҳкими ҳамкории гуногунсоҳаи мутақобилан судманди Тоҷикистону Қазоқистон мусоидат менамоянд.

                                                            Марзия  САИДЗОДА,
АМИТ «Ховар»

Июль 18, 2019 17:54

Хабарҳои дигари ин бахш

Дар Эстония Хонаи савдои Тоҷикистон таъсис дода мешавад
Намояндагони Тоҷикистон дар «Аirspace world 2024» дар Женева иштирок намуданд
Роҳбари хоҷагии деҳқонии «Бобои Носир»: «Истифодаи оқилонаи 7,5 гектар замин ва даромад аз он дар баланд гардидани сатҳи зиндагии 5 оила мусоидат намуд»
Деҳқонони ноҳияи Мастчоҳ имсол дар майдони зиёда аз 23 ҳазор гектар кишту парвариши зироати кишоварзиро ба нақша гирифтаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
«РОҲ БА СӮИ ТИЁНШОН». Душанбе охири моҳи май мизбони конфронси байналмилалӣ мегардад
Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд
Ҳоҷагидорони Кооперативи истеҳсолии «Сомон-Бохтар»-и ноҳияи Кӯшониён майдони парвариши лимӯро васеъ менамоянд
Сардхонаи муосири деҳоти «Файзи Истиқлол»-и ноҳияи Кӯшониён ба аҳолӣ хизмат мерасонад
«ТОҶИКИСТОН-2024». Дар Душанбе Намоишгоҳи байналмилалии универсалӣ доир мешавад
120 гектар замини канори деҳаи Ғӯсари шаҳри Панҷакент бо оби полезӣ таъмин мегардад
Масъалаи тезонидани корҳо оид ба тармим ва навсозии нақби «Истиқлол» дар Душанбе баррасӣ гардид