Даҳаи аввали моҳи сентябр Намоишгоҳи нуҳуми байналмилалии «Китоби Душанбе» баргузор мегардад

Август 25, 2019 10:24

ДУШАНБЕ, 25.08.2019. /АМИТ «Ховар»/. Аз 4 то 6 сентябр дар Муассисаи давлатии «Китобхонаи миллии Тоҷикистон» Намоишгоҳи байналмилалии «Китоби Душанбе» баргузор мегардад. Намоишгоҳи мазкур бо ташаббуси Вазорати фарҳанги Ҷумҳурии Тоҷикистон доир карда мешавад. Дар ин бора ба АМИТ «Ховар» аз Вазорати фарҳанг хабар доданд.

Ба иттилои манбаъ, дар доираи баргузории Намоишгоҳи нуҳуми байналмилалии «Китоби Душанбе» як зумра барномаҳо, аз ҷумла маҳфили шеъру суруд дар васфи китоб бо иштироки ҳунарпешагони театрҳо, толибилмони макотиби таҳсилоти умумӣ ва тарбиятгирандагони Филармонияи бачагонаи Тоҷикистон дар назар аст. Инчунин дар доираи намоишгоҳ баргузории конфронси илмӣ дар мавзӯи «Рушди соҳаи табъу нашр дар даврони истиқлолият», озмуни «Қироати шеъру тарона дар васфи Ватану диёр» бо иштироки хонандагони мактабҳо, муаррифии китобҳои тозанашри муассисаҳои нашриявии ватанӣ ва хориҷӣ ба нақша гирифта шудааст.

Ҳамзамон тибқи Низомномаи намоишгоҳ озмун иборат аз се номинатсия – «Ношири муваффақ», «Асари беҳтарин дар васфи Тоҷикистон», «Муаллифи сермаҳсули сол» эълон гардидааст, ки довталабон бояд то 30 августи соли равон маводашонро ба Кумитаи тадорукоти намоишгоҳ пешниҳод намоянд.

Ба зикри директори намоишгоҳ Абдуфаттоҳ Мираҳмадов, барои иштирок дар намоишгоҳ зиёда аз 50 муассиса – ноширони ватаниву хориҷӣ, китобхонаҳо, ташкилоти байналхалқӣ, донишгоҳҳо ва ҷамъиятҳо даъват шудаанд. Аз ҷумла, баҳри иштирок дар намоишгоҳ ба Федератсияи Россия, ҷумҳуриҳои Ҳиндустон, Туркия, Ўзбекистон,  Афғонистон, Иёлоти Муттаҳидаи Амрико, Беларус, Ҷумҳурии мардумии Чин, Франсия ва дигар давлатҳо даъватномаҳо ирсол гардидаанд.

Бояд тазаккур дод, ки бо мусоидат ва дастгириҳои Ҳукумати Ҷумҳурии Тоҷикистон аз соли 2010 инҷониб бахшида ба Рўзи китоб ҳамасола дар шаҳри Душанбе баргузории намоишгоҳҳои байналмилалии китоб ба ҳукми анъана даромадааст. Ин иқдоми наҷиб аз ҷониби роҳбарияти мамлакат, кулли фарҳангиён ва аҳли ҷомеа хуш пазируфта шуда, дар таҳкиму густариши равобити фарҳангии давлати соҳибистиқлоламон бо мамолики бо мо дўсту  бародар нақши созгор мегузорад.

«Бо шарофати соҳибстиқлолӣ мушкилоти соҳаи китобдорӣ сол аз сол  рў ба беҳбудӣ мениҳад, хазинаи китобхонаҳои шаҳру деҳот аз китобҳои тозанашр ғанӣ мегарданд, коргоҳҳои нав ба нави нашриётии  ҷавобгў ба талаботи муосир тавлид мешаванд, ноширони мамлакат  ҳамасола теъдоди зиёди адабиёти бадеӣ, илмию оммавӣ ва таълимиро ба табъ расонида, талаботи ба китоб — ин сарчашмаи маъонӣ доштаи хонандагонро пайваста қонеъ мегардонанд»,- ибрози назар кард Абдуфаттоҳ Мираҳмадов.

Ба гуфтаи мавсуф, ҳамасола адибону олимон ва ноширони тоҷик дар намоишгоҳҳои байналмилалии китоби Қазоқистон, Туркманистон, Беларус, Москва, Тошканд, Санкт-Петербург, Германия, Форуми тарҷумонон, нависандагон ва ноширони кишварҳои Иттиҳоди давлатҳои Мустақил, Озмуни байналмилалии «Санъати афсонагўӣ»-и Ҷумҳурии Корея фаъолона иштирок намуда, бо намоиши намунаҳо аз китобҳои арзишманди худ обрӯю нуфузи Тоҷикистонро дар арсаи ҷаҳон баланд мебардоранд.

Ҳамзамон онҳо ҳамасола барои иштироки фаъолона дар ин намоишгоҳҳо ва дастовардҳои чопиашон бо Диплому ҷоизаҳо сарфароз мегарданд.

Август 25, 2019 10:24

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус
НАВРӮЗ ДАР ЗАРАФШОН. Он бо «тухмҷангак»-и кӯдакон оғоз мегардад