Дар Куала-Лумпур масъалаи ба роҳ мондани ҳамкорӣ байни агентиҳои миллии иттилоотии Тоҷикистону Малайзия баррасӣ гардид

ДУШАНБЕ, 10.08.2019 /АМИТ «Ховар»/. 8 август Сафири Фавқулода ва Мухтори Ҷумҳурии Тоҷикистон дар Малайзия Ардашер Қодирӣ бо роҳбари Агентии миллии иттилоотии Малайзия «Bernama» хонум Нурини Кассим мулоқот намуд. Дар ин бора АМИТ «Ховар» бо истинод ба Вазорати корҳои хориҷии Тоҷикистон хабар медиҳад.

Зимни мулоқот ҷонибҳо дар бораи ҳолати кунунии муносибатҳои дуҷониба, дурнамои густариши ҳамкорӣ байни кишварҳо ва ба роҳ мондани ҳамкории байни агентиҳои миллии иттилоотии Тоҷикистону Малайзия табодули афкор намуданд.

Бояд тазаккур дод, ки Агентии миллии иттилоотии Малайзия «Bernama» соли 1967 аз ҷониби парлумони ин кишвар таъсис ёфта, 20 майи соли 1968 ба фаъолият шуруъ намудааст. Забонҳои кориаш малайзӣ, англисӣ, чинӣ, арабӣ ва испанӣ мебошанд. «Bernama» дар саросари Малайзия ва берун аз он, аз ҷумла дар Ҷакарта, Сингапур, Ню-Дели, Бангкок, Пекин, Дубай, Вашингтон, Лондон ва Австралия намояндагӣ ва хабарнигорони махсуси худро дорад.