ФУТБОЛ: дастаи мунтахаби наврасони то 16-солаи Тоҷикистон дар Ҷоми президенти Қазоқистон иштирок мекунад

ДУШАНБЕ, 20.08.2019 /АМИТ «Ховар»/. Дастаи  мунтахаби наврасони то 16-солаи Тоҷикистон таҳти роҳбарии сармураббӣ  Аҳлиддин Турдиев дар доираи омодагӣ ба марҳилаи интихобии Чемпионати Осиё-2020 дар 12-умин Мусобиқаи байналмилалии Ҷоми президенти  Қазоқистон  ширкат меварзад. Мусобиқаи мазкур аз  24  то  28 августи  соли равон  дар шаҳри  Нур-Султони  Қазоқистон баргузор мешавад.  Идомаи мавзӯъро шореҳи варзиши АМИТ «Ховар» Меҳрони Қурбон шарҳ медиҳад. 

Дар мусобиқаи мазкур дастаҳои мунтахаби наврасони  Тоҷикистон, Арманистон, Литва, Қирғизистон ва ду даста аз Қазоқистон байни ҳамдигар рақобат мекунанд. Ҳамаи бозиҳо дар майдони «Хонаи футбол» доир мешаванд. Дастаи  мунтахаби  наврасони то 16-солаи   Тоҷикистон   шомили гурӯҳи «В» буда, бо дастаҳои  мунтахаби наврасони  Арманистон  ва Қазоқистон  рӯ ба рӯ мешавад.

Ҷоми Президенти Қазоқистон -2019 миёни дастаҳои мунтахаби наврасон

Даври 1-ум

24 август (шанбе)

Арманистон (U-17) – Қазоқистон (U-16)

Қазоқистон (U-17) – Қирғизистон (U-16)

Даври 2-юм

25 август (якшанбе)

Тоҷикистон  (U-16) – Арманистон (U-17)

Қирғизистон (U-16) – Литва (U-17)

Даври 3-юм

26 август (душанбе)

Қазоқистон (U-16) – Тоҷикистон (U-16)

Литва (U-17) – Қазоқистон (U-17)

28 август (чоршанбе)

Бозӣ барои ишғоли ҷои 5-6

Бозӣ барои ишғоли ҷои 3-4

Финал

Ёдовар   мешавем, ки    чанде пеш    дар  Варзишгоҳи марказии шаҳри Душанбе бозии панҷум ва ниҳоии Чемпионати Ассотсиатсияи футболи Осиёи Марказӣ   CAFA -2019     миёни дастаҳои мунтахаби футболи наврасони  то  16-солаи Тоҷикистон ва Афғонистон баргузор шуд, ки он   бо ҳисоби 1:0 ба нафъи  дастаи мунтахаби Тоҷикистон хотима ёфт.

Ҳамин тавр, дастаи  мунтахаби наврасони Тоҷикистон бо касби 13 имтиёз пешсафи ҷадвал шуда, унвони чемпиони Ассотсиатсияи футболи Осиёи Марказиро соҳиб шуд. Медали нуқраи мусобиқоти мазкурро дастаи   мунтахаби наврасони Ӯзбекистон сазовор гардид. Дастаи мунтахаби наврасони  Эрон барандаи медали биринҷӣ гардид.

Бозингарони навраси  тоҷик бори дигар исбот намуданд, ки футбол дар Тоҷикистон босуръат рушд карда, ояндаи наздик дар мамлакати мо низ футболбозони сатҳи ҷаҳонӣ ба камол мерасанд.

Бояд зикр кард, ки  президенти Федератсияи  футболи Тоҷикистон Рустами Эмомалӣ   дар конгресси 4-уми CAFA, ки 24  апрели имсол дар Душанбе доир гардид, президенти нави Ассотсиатсияи футболи Осиёи Марказӣ интихоб шудааст.

Дар маросими ҷоизасупорӣ, ки баъди анҷоми бозии охирин миёни дастаҳои мунтахаби наврасони Тоҷикистон ва Афғонистон  шоми    1  август  дар Варзишгоҳи марказии  шаҳри  Душанбе доир гардид, Рустами Эмомалӣ ба беҳтаринҳо ҷоизаҳои CAFA –ро супорид.