Сафири Ҳиндустон Шри Вираҷ Сингх: «Рисолати мо вусъат бахшидан ба муносибатҳои дӯстона аст»

Август 15, 2019 16:24

ДУШАНБЕ, 15.08.2019 /АМИТ «Ховар»/. Имрӯз, 15 август дар Сафорати Ҳиндустон дар шаҳри Душанбе ба муносибати 73-юмин солгарди истиқлолияти кишвари Ҳиндустон барномаи  фарҳангӣ баргузор гардид, ки дар он меҳмонон аз дуру наздик иштирок намуданд.

Зимни оғози барномаи фарҳангӣ нахуст дар саҳни ҳавлии сафорат суруди миллии Ҳиндустон садо дод. Сипас дар дохили толори сафорат Сафири Ҳиндустон дар Тоҷикистон Шри Вираҷ Сингх матни табрикотии Президенти Ҳиндустон Рам Натх Ковиндро ба муносибати 73-юмин солгарди истиқлолияти давлатии Ҳиндустон қироат кард.

Сафири навтаъйини Ҳиндустон дар Тоҷикистон Шри Вираҷ Сингх иброз дошт, ки мақсаду мароми озодӣ- ин дӯст доштани Ватан аст. “Агарчи ман ба тозагӣ масъулияти сафириро дар Тоҷикистон бар дӯш дорам, ҳамоно хуб медонам, ки рисолати мо вусъат бахшидан ба муносибатҳои дӯстона аст. Мо ҳеҷ гоҳ аз дӯстиву бародарӣ бо кишварҳои ҳамсоя зарар намебинем. Дӯстӣ дар худ ҳама вақт пайомади хуб дорад, пас бояд нахуст равобити дӯстии худро қавӣ гардонем”.

Ҳамзамон суруду таронаҳо дар васфи Ватан дар иҷрои гулдухтарону наврасон пешкаши тамошобинон гардонида шуда, дар анҷоми барнома ба иштирокчиёни фаъол аз ҷониби сафир туҳфаҳои хотирмон тақдим карда шуд.

Гуфтан ба маврид аст, ки Ҳиндустон яке аз аввалин давлатҳое мебошад, ки Истиқлолияти Ҷумҳурии Тоҷикистонро 28 августи соли 1992 ба расмият шинохт. Соли 1994 Сафорати Ҳиндустон дар Тоҷикистон ва соли 2003 Сафорати Тоҷикистон дар Ҳиндустон кушода шуданд. Ҳоло 26 сол мешавад, ки Ҳиндустону Тоҷикистон — ду давлати ҳамсоя ва бо ҳам дӯст ҳамкории судманд ба роҳ монда, дар ҳалли бисёр масъалаҳои доғи вақт, аз ҷумла мубориза ба муқобили терроризм ҳамфикранд.

Аз соли барқарор намудани муносибатҳои дипломатӣ байни Ҳиндустону Тоҷикистон Президенти Тоҷикистон Эмомалӣ Раҳмон ба Ҳиндустон се сафари расмӣ (солҳои 1993,1995, 2001) ва се сафари давлатӣ (2006, 2012, 2016) намудаанд, ки дар натиҷа бештар аз 60 ҳуҷҷати байниҳукуматӣ ва байниидоравӣ дар соҳаҳои афзалиятноку ояндадори савдо, иқтисодиёт, дорусозӣ, кишоварзӣ, инфрасохтори роҳу нақлиёт, маориф, сайёҳӣ, технологияҳои иттилоотӣ, фарҳанг ва ғайра ба имзо расидаанд.

ДАР АКС: Шри Вираҷ Сингх, сафири навтаъйини Ҳиндустон дар Тоҷикистон зимни қабул аз ҷониби Президенти Ҳиндустон Рам Натх Ковинд дар Раштрапати-Бҳаван (Қасри Президент).

ДАР АКС: аввалин мулоқоти расмии Вазири корҳои хориҷии Тоҷикистон Сироҷиддин Муҳриддин бо Сафири навтаъйини Ҳиндустон дар Тоҷикистон Шри Вираҷ Сингх.

Сафарҳои давлатии сарварони олимақоми Ҳиндустон Президент Пратибҳа Патил (2009), Сарвазир Нарендра Модӣ (2015) ва дигар ашхоси расмии ин кишвар ба Тоҷикистон рӯз то рӯз бинои дӯстиву ҳамкории боманфиати ду мамлакатро қавитар намуда истодаанд. Бо дастгирии Шӯрои ҳиндустонии алоқаҳои фарҳангӣ садҳо ҷавонони тоҷикистонӣ дар Ҳиндустон таҳсил ё такмили ихтисос мекунанд.

Ҳамзамон аз тарафи Ҳиндустон Неругоҳи барқи обии “Варзоб-1” пурра тармим ва меҳмонхонаи “Шератон” (“Хилтон”) ба истифода дода шуданд.

Дар ин робита ҳамкории судманд дар соҳаи низомӣ низ назаррас аст.

Умед ЛОИҚЗОДА,
АМИТ «Ховар»

Август 15, 2019 16:24

Хабарҳои дигари ин бахш

Дар Душанбе ҳамкорӣ миёни Тоҷикистон ва ширкати «Genesis BBQ Group»-и Ҷумҳурии Корея баррасӣ гардид
Ҳамкории Тоҷикистон ва Узбекистон дар соҳаи истифодаи оқилонаи захираҳои обӣ баррасӣ гардид
Вазирони энергетикаи Тоҷикистон ва Туркия доир ба зарфияти энергетикии ду кишвар вохӯрии маҷозӣ доир намуданд
Сафири Тоҷикистон бо муовини Вазири тиҷорати Туркия мулоқот намуд
Дар Боку бахшида ба 30-солагии барқарорсозии муносибатҳои дипломатии Тоҷикистон ва Озарбойҷон конфронс доир шуд
Сироҷиддин Муҳриддин иҷрокунандаи вазифаи роҳбари Дафтари барномаҳои САҲА дар Душанбе Вук Жугичро ба ҳузур пазируфт
Музаффар Ҳусейнзода ва Валихан Туреханов ҳамкории бисёрҷониба миёни Тоҷикистон ва Қазоқистонро баррасӣ намуданд
Ҳайати Тоҷикистон бо намояндагони Малдив ва Филиппин дар Ҷопон мулоқот намуд
Тоҷикистон ва Ҷопон оид ба зарурати барқарор кардани муносибатҳои бародаршаҳрӣ мубодилаи афкор намуданд
Душанбе ва Боку тасмим гирифтаанд роҳи мустақими ҳавоӣ кушоянд
Намояндагони Бруней Доруссалом ба Конфронси дуюми байналмилалии Душанбе даъват шуданд
Нигоҳ аз Душанбе: Тоҷикистон ва Узбекистон наметавонанд аз ҳам ҷудо, бидуни дӯстиву ҳамкории мутақобила рушд кунанд