Сироҷиддин Муҳриддин: дар зиндонҳо ва урдугоҳҳои Ироқ ва Сурия қариб 600 шаҳрванди Тоҷикистон нигоҳдорӣ мешаванд

ДУШАНБЕ, 02.08.2019 /АМИТ «Ховар»/. «Дар зиндонҳо ва урдугоҳҳои   Ироқ ва Сурия қариб 600  нафар шаҳрвандони Тоҷикистон нигоҳдорӣ мешаванд», — иттиллоъ дод имрӯз зимни нишасти матбуотӣ Вазири корҳои хориҷии Ҷумҳурии Тоҷикистон Сироҷиддин Муҳриддин.

Ба гуфти Сироҷиддин Муҳриддин, дар зиндонҳои Ироқ 43 зан ва як кӯдак, дар урдугоҳҳои Сурия қариб 554 шаҳрванди Тоҷикистон нигоҳдорӣ мешаванд. Аз ин шумора дар урдугоҳҳои Сурия 86 зан,  228 духтарони ноболиғ ва 240 писарони ноболиғ қарор доранд.

Сироҷиддин Муҳриддин таъкид намуд, ки масъалаи баргардондани шаҳрвандони Тоҷикистон ба Ватан зери назорати бевоситаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад.

Ҷумҳурии Тоҷикистон дар самти баргардондани шаҳрвандон бо ҳукуматҳои Ироқ, Сурия ва созмонҳои байналмилалӣ ҳамкорӣ мекунад. Дар ин росто сафоратҳои Тоҷикистон дар минтақа барои гуфтушунид бо мақомоти далодори ин кишварҳо вазифадор шудаанд.