Дилшод Назаров: «Бо тамоми масъулият эълон мекунам, ки ҳамаи ҷоизаҳоро дар натиҷаи муборизаҳои ҳақиқӣ ба даст овардаам»

Сентябрь 26, 2019 10:08

ДУШАНБЕ, 26.09.2019 /АМИТ «Ховар»/. Гурзандози маъруфи  тоҷик  ва чемпиони Бозиҳои олимпӣ дар соли 2016 Дилшод Назаров гуфт, ки аз хабари ба истифодаи допинг гумонбар шудану маҳрум гардидан аз ҳаққи ширкат дар чемпионати ҷаҳон сахт ҳайратзада гардидааст, навиштааст имрӯз шореҳи варзиши АМИТ «Ховар» Меҳрони ҚУРБОН.

Дилшод Назаров, ки барои ширкат дар чемпионати ҷаҳон дар Қатар қарор дошт, гуфт, барои сафед кардани номаш адвокати аврупоӣ гирифтааст ва умедвор аст, ки мухлисон ӯро дар ин рӯзҳои сахт дастгирӣ мекунанд. Ӯ гуфт, ки «бо тамоми масъулият эълон мекунам, ки ҳамаи ҷоизаҳоро дар натиҷаи муборизаҳои ҳақиқӣ ба даст овардаам».

Роҳбарияти мақомоти варзиши Тоҷикистон низ ба допинг истифода бурдани Дилшод Назаров бовар надоранд. The Athletics Integrity Unit, ниҳоди мустақили мубориза бо падидаҳои манфӣ дар варзиши сабук 24  сентябр номи Дилшод Назаровро ба истифодаи допинг муттаҳам ва аз ҳаққи ширкат дар мусобиқаҳои минбаъда  маҳрум кард. Дар ин бора аз Кумитаи миллии  олимпӣ ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» хабар доданд.

Ба навиштаи созмон, тафтиши дубораи допинг дар мусобиқаи Чемпионати ҷаҳон дар соли 2011 дар Кореяи Ҷанубӣ «дар намунаи Дилшод Назаров маводи мамнӯи метаболити туринаболи даҳонӣ (metaboliteof oralturinabol)-ро ошкор кард».

Дилшод Назаров мегӯяд, тамоми талоши худро ба харҷ хоҳад дод, то ҳамаи гумонҳо нисбат ба ӯ рафъ шаванд. «Умед дорам, ба зудӣ номи неки худро барқарор кунам ва бори дигар парчами Ватанро дар мусобиқаҳои байналмилалӣ боло бардорам. Барои пуштибонӣ ва дарки шумо умед дорам»,-гуфтааст ӯ.

Дилшод Назаров феълан дар Қатар қарор дорад. Созмони мустақили The Athletics Integrity Unit, ки номи гурзандози тоҷик ва барандаи бозиҳои олимпии соли 2016-ро дар феҳрасти гумонбарон дар истеъмоли допинг шомил кард, мегӯяд, Дилшод Назаров бояд ба таври ҳатмӣ муқаррароти худдорӣ аз иштирок дар мусобиқаҳоро иҷро кунад.

Дафтари матбуоти ин созмон дар шарҳи қарор 25  сентябр     навиштааст, ки  «дар сурате ки варзишгар тавонад собит кунад, ки нақзи муқаррароти зиддидопингӣ бо истеъмоли маҳсулоти олуда бастагӣ мегирад, ин қарор бекор мешавад. Вале ин тасмим ба қарори муваққатан аз ширкат дар мусобиқаҳои байналмилалӣ маҳрум шудани варзишгар дар паи истеъмоли маводи олуда таъсир надорад ва бозбинӣ намешавад».

Дар Тоҷикистон ба иддаои ин созмон бо шубҳа менигаранд. Раиси Созмони миллии зиддидопингии Тоҷикистон Муҳаммадшо Абдуллозода гуфт, Дилшод Назаров пас аз ширкат дар Олимпиадаи соли 2016 аз ташхиси допинг гузашт ва «покиза» баромад.

Ӯ гуфт, «19   августи соли 2016 намояндагони Оҷонси байналмилалии зидди допинг (WADA) пешоби Дилшод Назаровро ташхис карданд. Бар асоси қоидаҳои WADA агар ташхис нишон медод, ки варзишгар маводи мамнӯъ истеъмол кардааст, ба ӯ дар муддати даҳ рӯз хабар медоданд ва ӯ муҷозот мешуд».

Абдуллоев афзуд, дар ин муддат касе аз WADA ба Дилшод Назаров ва созмонҳои варзишии марбута занг назадааст ва ё номаи расмӣ нафиристодааст: «Ин маънои онро дорад, ки Дилшод Назаров аз ташхиси допинг бо сарбаландӣ гузаштааст ва мо бовар надорем, ки ӯ аз маводи барои варзишгарон мамнуъ истифода карда бошад».

Моҷарои допинг ё истеъмоли маводи дорувории барои варзишгарон мамнуъ вақтҳои охир дар расонаҳои хабарии ҷаҳон ба мавзӯи доғ табдил шудааст. Бисёре аз варзишгарони маъруфи ҷаҳон барои истеъмоли маводе, ки онҳоро Оҷонси байналмилалии зидди допинг (WADA) ба феҳристи доруҳои мамнӯъ дохил кардааст, муҷозот шудаанд.

Бояд зикр кард, ки   то имрӯз ба Кумитаи миллии олимпӣ ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон  дар ин бора ягон ҳуҷҷати расмӣ нарасидааст.

Сентябрь 26, 2019 10:08

Хабарҳои дигари ин бахш

ҶОМИ ОСИЁ-2027. Дастаи мунтахаби Тоҷикистон барои бозӣ бо тими Филиппин вориди шаҳри Капас шуд
Дастаҳои мунтахаби наврасони Тоҷикистон ва Русия ду бозии дӯстона анҷом доданд
ФУТБОЛ. Дастаи мунтахаби олимпии Тоҷикистон (U-23) бо ҳамсолони худ аз Ҳиндустон ва Қирғизистон бозиҳои дӯстона анҷом медиҳад
Дар Истанбул бахшида ба Рӯзи ҷаҳонии футбол барои донишҷӯёни тоҷик мусобиқа доир карда шуд
Дастаи мунтахаби наврасони Тоҷикистон (U-16) дар Ҳисор бо дастаи Русия бозиҳои дӯстона анҷом медиҳад
Рақибони мунтахаби футзали Тоҷикистон дар марҳилаи интихобии Ҷоми Осиё-2026 рӯзи 26 июн маълум мешаванд
Рақибони дастаи мунтахаби олимпии Тоҷикистон (U-23) дар мусобиқоти интихобии Ҷоми Осиё-2026 муайян шуданд
Тоҷикистонро дар Чемпионати ҷаҳон оид ба гӯштини ҷудо 9 паҳлавон муаррифӣ мекунад
Дастаи мунтахаби Тоҷикистон барои анҷоми бозии дӯстона бо дастаи Камбоҷа вориди шаҳри Пномпен шуд
Дар Маҷмааи лижаронии «Сафеддара» «Эко-пойга барои пиряхҳо» баргузор шуд
Варзишгар аз Амрико Каролина Глейш: «Ба дӯстону ҳамкоронам дар бораи табиати нотакрори Тоҷикистон нақл хоҳам кард»
ФУТБОЛ. Дастаи наврасони то 16-солаи Тоҷикистон ғолиби Чемпионати CAFA-2025 гардид