Вазорати рушди иқтисод ва савдо: маҷмӯи маҳсулоти дохилии Тоҷикистон 7,4% афзудааст

ДУШАНБЕ, 19.09.2019 /АМИТ «Ховар»/. Маҷмӯи маҳсулоти дохилии Тоҷикистон дар ҳашт моҳи аввали соли 2019 зиёда аз 4,6 миллиард доллар ё 44 миллиарду 893,8 миллион сомониро ташкил дод.  Дар ин бора ба АМИТ «Ховар» аз Вазорати рушди иқтисод ва савдои Ҷумҳурии Тоҷикистон хабар доданд.

Ба иттилои манбаъ, нисбат ба ҳамин давраи соли 2018 рушди иқтисодиёт бо нархҳои муқоисашаванда то 7,4% ба мушоҳида мерасад.

Дар низоми ММД (маҷмӯи маҳсулоти дохилӣ) болоравии истеҳсоли маҳсулоти саноатӣ — 13,3 фоиз (12,9% дар 8 моҳи соли 2018) бартарият дорад. Дар ҷои дуюм маҳсулоти кишоварзӣ ҷойгир аст, ки 8,3% мебошад. Пас аз он муомилоти савдои чакана (8,5%), боркашонӣ (4,7%) ва хизматрасонии пулӣ (2%) қарор доранд.

Дар Вазорат хотирнишон карданд, ки афзоиши ҳиссаи саноат дар низоми ММД (маҷмӯи маҳсулоти дохилӣ) (ин нишондиҳанда дар 8 моҳ 17,9% — ро ташкил медод) ба амалисозии ҳадафи чоруми стратегии миллӣ–саноатикунонии Тоҷикистон, ки қаблан Президенти мамлакат эълон карда буданд, вобастагӣ дорад.

Ёдовар мешавем, ки гузариш аз сохти рушди агросаноатӣ ба сохти индустриалӣ-аграрӣ яке аз вазифаҳои асосии Стратегияи миллии рушди Тоҷикистон барои давраи то соли 2030 мебошад.