Ба Қонун «Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон» тағйиру иловаҳо ворид мегарданд

ДУШАНБЕ, 14.10.2019 /АМИТ «Ховар»/. Имрӯз, 14 октябр таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров ҷаласаи Шӯрои Маҷлиси намояндагон  баргузор гардид.

Дар кори ҷаласаи Шӯро вакилон масъалаи ворид намудани  тағйиру иловаҳо ба Қонуни Ҷумҳурии Тоҷикистон «Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон»-ро баррасӣ намуданд.

Тавре Раиси кумитаи Маҷлиси намояндагон оид ба тартиботи ҳуқуқӣ, мудофиа ва амният Ҷурахон Маҷидзода дар ҷаласа  иброз дошт, «лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон» бо мақсади мутобиқгардонии он ба санадҳои меъёрии ҳуқуқии амалкунандаи Ҷумҳурии Тоҷикистон ва санадҳои ҳуқуқи байналмилалӣ, инчунин мукаммалгардонии вазифаҳо ва самтҳои асосии фаъолияти Агентии назорати давлатии молиявӣ ва мубориза бо коррупсияи Ҷумҳурии Тоҷикистон, дахолат накардан ба фаъолияти кормандон, дақиқ кардани сохтор, бо ризояти Президенти Ҷумҳурии Тоҷикистон ба вазифа таъйин ва аз вазифа озод кардани сардорони сарраёсатҳо ва раёсатҳои дастгоҳи марказӣ, сардорони раёсатҳои минтақавӣ, аз ҷумла ҷойивазкунии (ротатсияи) ҳайати роҳбарикунандаи Агентии номбурда таҳия ва пешниҳод гардидааст».

Ҳамчунин дар ҷаласаи Шӯро Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи иттифоқҳои касаба»,  лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи корхонаҳои давлатӣ», лоиҳаи Қонуни Ҷумҳурии Тоҷикистон «Оид ба ворид намудани тағйирот ба Қонуни Ҷумҳурии Тоҷикистон «Дар бораи бақайдгирии давлатии шахсони ҳуқуқӣ ва соҳибкорони инфиродӣ» ва дигар масъалаҳо мавриди баррасӣ қарор гирифтанд.

Дар фарҷом аъзои Шӯро аз рӯи ҳамаи масъалаҳои баррасигардида қарорҳои дахлдор қабул намуданд.