Раиси Маҷлиси намояндагон Шукурҷон Зуҳуров: «Санъати бахшидану гузашт намудан аз беҳтарин воситаҳои тарбияи инсонӣ, омили муҳими фаҳм ва дарки мардуми раҳгумзада аст»

Октябрь 25, 2019 17:23

ДУШАНБЕ, 25.10.2019. /АМИТ «Ховар»/. Тавре иттилоъ додем, Маҷлиси намояндагони Маҷлиси Олии Ҷумҳурии Тоҷикистон лоиҳаи Қонуни Ҷумҳурии Тоҷикистон «Дар бораи авф»-ро, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо истифода аз ҳуқуқи конститутсионии худ, дар асоси принсипи инсондӯстонаи қонунгузории Ҷумҳурии Тоҷикистон ва ба муносибати 25-умин солгарди қабули Конститутсияи Ҷумҳурии Тоҷикистон барои баррасӣ ба ин ниҳод пешниҳод карда буданд, қабул намуд.

Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров имрӯз дар ҷаласаи навбатии иҷлосияи шашуми Маҷлиси намояндагон, даъвати панҷум, ки ин масъала мавриди муҳокима қарор дода шуд, роҷеъ ба Қонуни Ҷумҳурии Тоҷикистон «Дар бораи авф» сухан гуфт, ки онро манзури хонандагон мегардонем:

— Инак ҳар яки мо бо раъйи худ  16-умин Қонуни авфро нисбат ба шаҳрвандоне, ки таҳти омилҳои мухталифи ҳаётӣ даст ба ҷиноят задаанд, қабул намуда, саҳми худро ба рисолати бузургу таърихии давлатсозии Асосгузори сулҳу ваҳдати миллӣ,  Пешвои миллат-Президенти Ҷумҳурии Тоҷикистон муҳтарам Эмомалӣ Раҳмон гузоштем.

Санъати бахшидану гузашт намудан аз беҳтарин воситаҳои тарбияи инсонӣ, омили муҳими фаҳм, дарки мардуми раҳгумзада ва воситаи муассири ворид намудани доираи васеи шаҳрвандон ба фаъолияти созандаи ҷомеа ва давлат аст.

Бузургони мо беҳуда нагуфтаанд: «Ҳарчанд гуноҳ бузург аст, фазилати авфкунанда зиёдтар аст».

Гузашт намудан, бахшиш кардан ва оғӯш кушодани Пешвои муҳтарами миллат ба рӯи мардуми раҳгумзадаи халқи мо буд, ки ватанро то ба ин рӯзҳои таърихӣ ва тақдирсоз расонда, халқро муттаҳид намуд.

Қонуни авфи ба тозагӣ қабулшуда санади воқеан таърихист, зеро тибқи ҳисоби пешакӣ, он нисбат ба зиёда аз бист ҳазор нафар гумонбаршудагон, айбдоршавандагон, судшавандаҳо ва маҳкумшудагон татбиқ мегардад.

Аз ҷумла, зиёда аз ҳафт ҳазор нафар аз адои ҷазо аз муассисаҳои иҷрои ҷазо озод гардида, беш аз чор ҳазору панҷсад нафар аз ҷазоҳои дигари ба ҷазои маҳрум сохтан аз ҷазои ба озодӣ алоқаманд набуда озод карда мешаванд. Нисбат ба маҳкумшудагони зиёд муҳлати адои ҷазои маҳрум сохтан аз озодӣ кам карда мешавад. Қонуни мазкур инчунин нисбат ба зиёда аз ду ҳазор шахсоне, ки парвандаҳои ҷиноятии онҳо дар баррасии мақомоти таҳқиқ, тафтиши пешакӣ ё судҳо қарор доранд, татбиқ карда мешавад.

Равшан аст, ки дар пасманзари рӯзгори ин теъдод шахсон фарзандон, падару модарон, хешу табор, наздикону дӯстон ва дар маҷмӯъ мардуми Тоҷикистон истодаанд.

Бовар дорам, онҳое, ки аз сабукии ин қонун бархӯрдор мегарданд, чӣ раҳгумзадагону хатокорони қонун, чӣ хешовандону  наздикони онҳо ҳикмат ва рисолати ин санади тақдирсозро дуруст дарк намуда, ба қадри ин ғамхории Сарвари давлат расида, дар роҳи ислоҳи худ ва наздиконашон саъй намуда, дар ҳаёти созандаю осоиштаи мамлакат фаъолона ширкат меварзанд.

Аз ин хотир, ҳамаи онҳоеро, ки чашми умед бар бахшиш доштанду нияти неки ислоҳро дар тафаккур мепарвариданд, ин лаҳза, бо хушхабари қабули Қонуни авф муборак гуфта, ба якояки шумо барои дастгириатон аз ин иқдоми накӯ арзи сипос мекунам, аз номи шумо, аз номи кулли интихобкунандагони ҷумҳурӣ ва шахсан худам ба Пешвои муаззам ва муҳтарами миллат барои ин иқдоми навбатии созанда ва инсондӯстонаашон, ки ба муттаҳидию ваҳдати миллат, ба оромию ободии мамлакат нигаронида шудааст, миннатдории бепоён баён менамоям.

Дар охир ба як масъалаи муҳим диққати шуморо ҷалб кардан меҳоҳам.

Тибқи моддаи 21-и қонун як қатор мақомоти дахлдори давлатӣ муқаррароти қонунро бояд амалӣ намоянд. Дар ин раванд риояи дақиқи қоидаҳои муқарраргардидаи қонун яке аз шартҳои муҳими баланд бардоштани муассирият ва эътибори он ба ҳисоб меравад.

Ҳамзамон аз нигоҳи мо ба раванди мазкур, бинобар аҳамияти иҷтимоӣ доштани масъала, мақомоти ваколатдори соҳавӣ, аз қабили меҳнат ва шуғли аҳолӣ, тандурустӣ ва соҳаи маориф низ бояд ҷалб карда шаванд.

Зеро барқарор намудани саломатии баъзе аз авфшавандаҳо, ба омӯзишу таълим ва ба ҷойи кор ҷалб шудани онҳо аз масъалаҳои калидӣ маҳсуб мешавад.

Боварӣ дорам, ки вазорату кумитаҳои масъул ва идораҳои дахлдор, алалхусус мақомоти маҳаллии ҳокимияти давлатӣ барои дар сатҳи волову шоиста татбиқ намудани муқаррароти Қонуни мазкур тамоми зеҳнияту имконияти худро равона месозанд ва барои пайвастан ба зиндагии комил тадбирҳои дахлдору саривақтӣ меандешанд, то реинтегратсияи авфшудагон дар ҳаёти иҷтимоӣ ва иқтисодии мамлакат  бо муваффақият амалӣ гардад.

Октябрь 25, 2019 17:23

Хабарҳои дигари ин бахш

Муовини Раиси Маҷлиси намояндагон бо ҳайати Шоҳигарии Белгия мулоқот намуд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ дар шаҳри Сочӣ аз маҷмааи таълимии «Сириус» дидан намуданд
Раиси Маҷлиси намояндагон бо роҳбарони ҳайатҳои Форуми «Муколамаи занони Осиёи Марказӣ» мулоқот намуд
Рустами Эмомалӣ бо Раиси Думаи давлатии Маҷлиси Федералии Федератсияи Русия Вячеслав Володин мулоқот намуданд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Президенти Федератсияи Русия Владимир Путин мулоқот намуданд
Рустами Эмомалӣ бо Раиси Шурои Федератсияи Маҷлиси Федералии Федератсияи Русия Валентина Матвиенко мулоқот намуданд
Рустами Эмомалӣ дар назди оромгоҳи Сарбози номаълум дар боғи Александри шаҳри Москва гулчанбар гузоштанд
Рустами Эмомалӣ барои анҷом додани сафари расмӣ вориди шаҳри Москва гардиданд
Дар Маҷлиси намояндагон Қонуни Ҷумҳурии Тоҷикистон «Дар бораи маърифати экологии аҳолӣ» баррасӣ гардид
Рустами Эмомалӣ ба шаҳри Москваи Федератсияи Русия сафар намуданд
Дар Душанбе рушди муносибатҳои байнипарламентии Тоҷикистон ва Ҷопон баррасӣ гардид
Дар Душанбе густариши ҳамкории байнипарламентии Тоҷикистон ва Туркия баррасӣ гардид