Тасаллияти Пешвои миллат Эмомалӣ Раҳмон вобаста ба даргузашти деҳқони шинохтаи мамлакат Камол Мадумаров

ДУШАНБЕ, 04.10.2019 /АМИТ «Ховар»/. Субҳи имрӯз деҳқони ботаҷриба ва ангурпарвари шинохтаи мамлакат Камол Мадумаров дар синни 80-солагӣ аз олам даргузашт.

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо писари калони марҳум телефонӣ дар тамос шуда, бо изҳори ҳамдардии амиқ ба аҳли хонадони шодравон ва наздикону пайвандон аз даргоҳи Худованди муттаъол сабри ҷамил хостанд.

Камол Мадумаров дар давоми умри бобаракати худ барои рушди соҳаи кишоварзии мамлакат, бахусус боғдорию ангурпарварӣ саҳми босазо гузошта, таҷрибаву малакаи худро барои пешрафт ва ободии диёри хеш сарф кардааст.