Дар ноҳияи Мастчоҳ нуқтаи нави хизматрасонии милитсияи сайёҳӣ ба истифода дода шуд

ДУШАНБЕ, 22.11.2019 /АМИТ «Ховар»/. Дар назди гузаргоҳи наздисарҳадии «Фотеҳобод»-и ноҳияи Мастчоҳ нуқтаи нави хизматрасонии милитсияи сайёҳӣ ба истифода дода шуд. Ҳамчунин ҳафтаи гузашта ҳамин гуна нуқтаи хизматрасонӣ дар гузаргоҳи наздисарҳадии «Саразм»-и шаҳри Панҷакент мавриди баҳрабардорӣ қарор гирифта буд.

Тавре  аз маркази матбуоти Вазорати корҳои дохилии Ҷумҳурии Тоҷикистон  ба АМИТ «Ховар» хабар доданд,  ба фаъолият шурӯъ намудани чунин нуқтаҳо бо мақсади рушди сайёҳӣ дар мамлакат роҳандозӣ гардида, натиҷаи ҳамкории шуъбаи милитсияи сайёҳии Раёсати экологӣ ва сайёҳии ВКД ва ширкати алоқаи мобилии Tcell мебошад.

Дар маросими ба истифодадиҳии нуқтаҳои хизматрасонии милитсияи сайёҳӣ кормандони масъули милитсияи сайёҳӣ ва роҳбарияти ширкати Tcell иштирок доштанд.

Нуқтаи хизматрасонии милитсияи сайёҳӣ дар ноҳияи Мастчоҳ чорумин нуқтаи хизматрасонии милитсияи сайёҳӣ дар вилояти Суғд аст, ки дари худро барои хизмат расонидан ба сайёҳони дохиливу хориҷӣ боз намудааст. Дар ин нуқтаҳои хизматрасонӣ, ки дар мавзеъҳои намоёну дастрас ҷойгиранд, сайёҳи муроҷиаткунанда метавонад барои муоширати мобилӣ аз ширкати Tcell симкорти сайёҳии ройгон дастрас намояд.  Дар тавозуни он 100 дақиқа вақт барои зангҳои телефонӣ ва 100 мегабайт интернет барои истифода то ба охир расидани муҳлати раводид, ки 45 шабонарӯзро дар бар мегирад, мавҷуд аст. Ҳангоми дар қайд гузоштан муҳлат тамдид карда мешавад.

Ҳамзамон тариқи бастани шартомаи тарафайн бо шуъбаи милитсияи сайёҳии Раёсати экологӣ ва сайёҳии ВКД ба сайёҳ хизматрасонии роҳбаладӣ аз ҳисоби кормандони милитсияи сайёҳӣ расонида мешавад.