Роҳнамои аудиоии мавзеи таърихии Саразми бостонӣ бо ду забон омода шуд

Ноябрь 21, 2019 14:30

ДУШАНБЕ, 21.11.2019. /АМИТ «Ховар»/. Дар партави дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бахшида ба ҷашни 5500-солагии Саразми бостонӣ Кумитаи рушди сайёҳӣ дар ҳамкорӣ бо шарикони рушд роҳнамои аудиоиро барои шиносоӣ бо таърихи Саразм бо забонҳои русӣ ва англисӣ барои сайёҳон омода ва дар шабакаи интернет ҷойгир намуд, хабар медиҳад АМИТ «Ховар».

Сайёҳони дохилию хориҷӣ метавонанд роҳнамои мазкурро аз ин замима — https://izi.travel/en/aea5-historico-archeological-site-sarazm/en ройгон дастрас намуда, бо 5 макони таърихии ин мавзеи бостонӣ шинос шаванд. Замимаи мазкур аз ҷониби ҳазорон истифодабарандагон, аз ҷумла осорхонаҳо, ширкатҳои сайёҳӣ, роҳбаладон истифода бурда мешавад. Сомонаи мазкурро ҳар моҳ ҳафт миллион нафар аз 100 мамлакати дунё ва 2250 шаҳрҳои олам бо 59 забон тамошо мекунанд.

Яке аз нодиртарин ёдгориҳои фарҳангии Осиёи Марказӣ, ватани аввалини зироаткорон ва аввалин филизгудозони қавми ориёӣ, маскани сароғози таъриху фарҳанг ва тамаддунсозии аҷдодони тоҷикон — Саразм дар километри 12-уми қисмати ғарбии шаҳри Панҷакент, дар соҳили чапи дарёи Зарафшон ҷойгир буда, масоҳати умумии он зиёда аз 100 га ва ҳудуди омӯзишаш 30 гектарро ташкил медиҳад.

Таҳқиқоти бостоншиносӣ дар Саразм аз соли 1977 бо сардории бостоншинос Абдулло Исҳоқӣ оғоз шуда, то соли 1997 давом ёфт ва аз соли 1997 ба корҳои мазкур бостоншинос А. Раззоқов роҳбарӣ дорад. Дар ин ҷо экспедитсияҳои бостоншиносии байналмилии олимони ИМА, Франсия, Италия, Россия ва дигар мамлакатҳо дар солҳои гуногун пажӯҳиш намуданд.

Ҳафриёт собит намуданд, ки деҳшаҳри Саразм ҳанӯз 5500 сол муқаддам дар замони энеолитӣ ташаккул ёфтааст. Танҳо дар замони асри биринҷӣ саразмиҳо бо сабабҳои ҳанӯз номаълум ба дигар минтақаҳо кӯч бастанд.

Саразм қадимтарин манзилу маскану шаҳраки ниёгонамон ба ҳисоб рафта, ҳамчунин аввалин ёдгории кишоварзу чорводорон, ҳунарманду меъморон дар таърихи мардуми ориёно мебошад.

Бо назардошти аҳамияти бузурги таърихӣ доштанаш ва ҳамчун шаҳодати беназири куҳанбунёдиву тамаддунофарии халқи тоҷик бо Қарори Ҳукумати Ҷумҳурии Тоҷикистон аз 21 сентябри соли 2000 дар ин ҳудуд Мамнӯъгоҳи таърихию бостоншиносии Саразм таъсис дода шуд.

Соли 2010 дар Сессияи 36-уми ЮНЕСКО дар шаҳри Рио-де-Женейрои Бразилия Саразм ба Феҳристи умумиҷаҳонии мероси фарҳангии ЮНЕСКО ворид карда шуд.

Соли 2018 34800 нафар сайёҳон, аз ҷумла 24120 нафар сайёҳони дохилӣ ва 10680 нафар сайёҳони хориҷӣ аз мавзеи Саразми бостонӣ дидан намуданд.

Ноябрь 21, 2019 14:30

Хабарҳои дигари ин бахш

Соли 2022 беш аз 138 ҳазор нафар сайёҳон аз мавзеъҳои таърихию фарҳангии вилояти Суғд дидан карданд
АРҶ МЕГУЗОРЕМ. Дар Бохтар Осорхонаи Ҳунарпешаи халқии Тоҷикистон Аловуддин Абдуллозода таъсис меёбад
«КУРУШИ КАБИР»-ЛОИҲАИ НАВИ БАЛЕТ. Ба наздикӣ он дар Душанбе рӯнамоӣ мегардад
Тоҷикистон ҳуҷҷатҳои дахлдорро барои ба номинаи объектҳои мадании ЮНЕСКО ворид шудани Мамнуъгоҳи «Бешаи палангон» пешниҳод намуд
Дар Тоҷикистон Озмоишгоҳи таҳқиқотӣ-сотсиологии фарҳанг ва воситаҳои ахбори омма ифтитоҳ ёфт
Пагоҳ Вазорати нақлиёт, Агентии авиатсияи гражданӣ, Хадамоти назорати давлатии бехатарии корҳо дар саноат ва соҳаи кӯҳкорӣ ва Саридораи геология нишасти матбуотӣ баргузор менамоянд
Имрӯз Кумитаи рушди маҳал, Кумитаи ҳифзи муҳити зист, Агентии беҳдошти замин ва обёрӣ, Агентии хоҷагии ҷангал нишасти матбуотӣ баргузор менамоянд
Вазорати фарҳанг: «Аз ҳисоби Фонди захиравии Президенти Ҷумҳурии Тоҷикистон 21 номгӯй китоб ба нашр расид»
Номинаи муштараки «Санъати зарҳалкорӣ» барои қабул ба рӯйхати Феҳристи мероси фарҳанги ғайримоддии ЮНЕСКО пешниҳод карда шуд
Пагоҳ Кумитаи рушди маҳал, Кумитаи ҳифзи муҳити зист, Агентии беҳдошти замин ва обёрӣ, Агентии хоҷагии ҷангал нишасти матбуотӣ баргузор менамоянд
«Соли 2022 бори аввал дар Тоҷикистон Бозиҳои Делфӣ баргузор гардид»,- бардошт аз нишасти матбуотии Вазорати фарҳанг
ДАСТОВАРДИ ФАРҲАНГӢ. Хонандагони шаҳри Душанбе дар Олмон сазовори Гран-при ва ҷойи якум шуданд