Сарҳадбонони Тоҷикистону Ӯзбекистон ҷиҳати таҳкими ҳамкорӣ мулоқот намуданд

ДУШАНБЕ, 11.11.2019 /АМИТ «Ховар»/. 10 ноябр  дар нуқтаи гузаргоҳи сарҳадии «Дӯстӣ»-и шаҳри Турсунзода ҳайати роҳбарияти  Қӯшунҳои сарҳадии Кумитаи давлатии амнияти миллии  Ҷумҳурии Тоҷикистон  ва     Қӯшунҳои сарҳадии Хадамоти амнияти давлатии  Ҷумҳурии Ӯзбекистон таҳти роҳбарии фармондеҳони ҳарду ҷониб  Раҷабалӣ Раҳмоналӣ ва Руслан Мирзаев мулоқот намуданд. 

Дар вохӯрии мазкур  масъалаҳои  рушду такомули минбаъдаи муносибатҳои ҳамсоягии нек ва дӯстона, инкишофи ҳамкории мутақобилан судманд дар соҳаи ҳифзи сарҳади давлатӣ миёни мақомоти сарҳадии ҳарду давлат мавриди  баррасӣ  қарор гирифтанд.

Аз ҷумла, миёни намояндагони сарҳадии ҳарду  давлат дар  масъалаи мубориза бар зидди қочоқи маводи нашъаовар ва яроқу аслиҳа, терроризми байналмилалӣ, ифротгароӣ дар минтақаҳои наздисарҳадӣ, огоҳ, ошкор ва пешгирӣ намудани ҳолатҳои қочоқи маводи мухаддир,  фаъолияти гурӯҳҳои ғайриқонунии ҷиноятпеша,  муҳоҷирати ғайриқонунӣ ва дигар масъалаҳои муҳими соҳа мубодилаи афкор сурат гирифт.