Бонувони муштзани тоҷик дар Ҷоми ҷаҳон оид ба бокс соҳиби медалҳои нуқра ва биринҷӣ шуданд

ДУШАНБЕ, 16.12.2019 /АМИТ «Ховар»/. Аз 11 то 14 декабр дар шаҳри Белоярски Федератсияи Россия миёни кишварҳои истеҳсолкунандаи нефт 17-умин Ҷоми ҷаҳон оид ба бокс (World Cup of Boxing Oil Countries) баргузор шуд.

Дар мусобиқаи мазкур варзишгари тоҷик Миҷгона Самадова дар вазни 57 кг пас аз ду пирӯзӣ бар варзишгарони Россия Малика Шоҳидова ва Ирина Сафарова дар финал аз намояндаи дигари кишвари мизбон Даря Абрамова мағлуб шуда, соҳиби ҷои дуюм шуд.

Шоира Зулқайнарова дар чорякфинали вазни 60 кг бар Анастасия Горожантсева (Россия) ғалаба карда, дар нимфинал аз намояндаи дигари Россия Наталия Шадрина шикаст хӯрд ва ҷои сеюмро ишғол намуд.

Ёдовар мешавем, ки Ҷоми ҷаҳон оид ба бокс аз рӯи 8 вазн миёни мардон, 5 вазн миёни бонувон доир шуда, дар он  127 нафар варзишгарон (87 мард, 40 зан) аз 23 давлати дунё  иштирок намуданд.