Дар Душанбе Намоишгоҳи ихтисосии Ҷумҳурии Исломии Эрон ифтитоҳ гардид

Декабрь 21, 2019 14:27

ДУШАНБЕ, 21.12.2019 /АМИТ «Ховар»/. Имрӯз дар Муассисаи давлатии «Кохи Борбад»-и шаҳри Душанбе бо дастгирии Ҳукумати Ҷумҳурии Тоҷикистон ва Палатаи савдо ва саноати Ҷумҳурии Тоҷикистон намоишгоҳи ихтисосии Ҷумҳурии Исломии Эрон ифтитоҳ гардид.

Тавре мухбири  АМИТ  «Ховар» хабар медиҳад, дар ифтитоҳи намоишгоҳи мазкур   Вазири рушди иқтисод ва савдои Ҷумҳурии Тоҷикистон Неъматулло Ҳикматуллозода, Раиси Кумитаи давлатии сармоягузорӣ ва идораи амволи давлатии Тоҷикистон Фаррух Ҳамрализода, Раиси Палалатаи савдо ва саноати Тоҷикистон Ҷамшед Ҷумъахонзода, Сафири Ҷумҳурии Ислдомии Эрон дар Ҷумҳурии Тоҷикистон Муҳаммадтақӣ Собирӣ,  намояндагони сафоратхонаҳо ва Минтақаҳои озоди иқтисодии мамлакат иштирок намуданд.

Раиси Палатаи савдо ва саноати Ҷумҳурии Тоҷикистон Ҷамшед Ҷумъахонзода  иброз намуд, ки дар ин  намоишгоҳ зиёда аз 60  ширкатҳои фаъоли  иқтисодии  Эрон дар бахшҳои истеҳсолӣ, саноати хӯрока, беҳдошту дармон, мошинолоти кишоварзӣ, сохтмон, хадамоти фаннӣ ва муҳандисӣ, қолин, таҷҳизоти манзил, сайёҳӣ ва ғайра маҳсулот пешниҳод менамоянд. Мақсади асосии ташкил намудани ин намоишгоҳ рушди тиҷорат байни Тоҷикистону Эрон  мебошад.

“Итминон дорем, ки  ин намоишгоҳ натиҷаи мусбӣ  ба бор оварда, барои  таъсиси корхонаҳои муштарак ва ҳамкорӣ дар соҳаи савдо ва саноат миёни ду давлат мусоидат менамояд”, — зикр кард  номбурда.

Вазири рушди иқтисод ва савдои Ҷумҳурии Тоҷикистон Неъматулло Ҳикматуллозода  иброз дошт, ки тӯли чанд соли охир Ҷумҳурии Тоҷикистон ба суръати баланди рушди иқтисодӣ  ноил гардида, тавонист тамоюли бемайлони савдои хориҷӣ ва ҳамгироии ҷумҳуриро  бо ҷомеаи ҷаҳонӣ вусъат бахшад. Дар баробари ин,  Ҷумҳурии Тоҷикистон барои ривоҷи ҳамгироии иқтисодӣ бо кишварҳои хориҷ, аз ҷумла бо Эрон кӯшиш ба харҷ дода,  Ҷумҳурии Тоҷикистон ва Ҷумҳурии Исломии Эрон аз ҷумлаи шарикони боэътимод дар самти густариши ҳамкории  иқтисодӣ ва  энергетикӣ  ба ҳисоб мераванд.

Тавре Сафири Ҷумҳурии Исломии Эрон  Муҳаммадтақӣ Собирӣ  изҳор намуд,   намоишгоҳи имрӯза барои густариши  равобит ва  ҳамкории дуҷониба фурсати  муносиб фароҳам меорад.

«Ҳамкорӣ дар соҳаи  туризм, гардишгарӣ, хадамоти фаннӣ ва муҳандисӣ, фарҳанг, сармоягузории муштараки кишоварзӣ, робитаи  донишгоҳҳои илмӣ  аз мақсадҳои  наҷибу минбаъдаи ҷонибҳост, ки   итминон дорам дар кутоҳтарини замон ба онҳо ҷомаи амал пӯшонем»,- афзуд сафир.

Ҳамчунин баргузории  намоишгоҳи  мазкур барои  тоҷирону сармоягузорони ширкатҳои Эрон ва Тоҷикистон фурсати муносиб барои гуфтугӯ ҷиҳати баррасии ҳамкории тиҷоратӣ, истеҳсолӣ, соҳибкорӣ ва маблағгузории муштарак  фароҳам меорад.

Бояд гуфт, ки дар доираи ин намоишгоҳ 23 декабр  дар «Кохи Борбад» баргузории  Бизнес-форуми доираҳои соҳибкорони Тоҷикистон ва Эрон дар назар аст.

Ёдовар мешавем, ки охирин намоишгоҳи маҳсулоти эронӣ дар пойтахти Тоҷикистон моҳи майи  соли 2017 баргузор шуда буд, ки    дар он беш аз 20 ширкати эронӣ иштирок намуда буданд.

Намоишгоҳи ихтисосии Ҷумҳурии Исломии Эрон дар Ҷумҳурии Тоҷикистон то 24 декабр идома меёбад.

   София ШОИК,
АМИТ «Ховар»

Декабрь 21, 2019 14:27

Хабарҳои дигари ин бахш

Инъикоси густурдаи таҷлили Ҷашни байналмилалии Наврӯз бо иштироки Сарони се давлати Осиёи Марказӣ дар расонаҳои хабарии минтақаю ҷаҳон ва шабакаҳои иҷтимоӣ
Эмомалӣ Раҳмон: «Натиҷаҳои вохӯриҳои имрӯзаро мо ҳамчун пайки таҷдид ва оғози марҳилаи сифатан нав дар муносибатҳои се кишвар медонем»
Президенти Тоҷикистон: «Худдорӣ намудан аз ҳама гуна зиёдаравию исрофкорӣ вазифаи ҳар бандаи муъмин дар ҳама ҳолат, аз ҷумла дар айёми ид мебошад»
23 март-Рӯзи ҷаҳонии обуҳавошиносӣ. Дар ҳар се соат ҳавошиносони тоҷик ба Хадамоти ҷаҳонии ҳавошиносӣ маълумот пешниҳод менамоянд
«НАВРӮЗ ДАР АСЛ ҶАШНИ ЗИНДАГИСОЗ АСТ». Иқтибос аз суханрониҳои Президенти Ҷумҳурии Тоҷикистон
ИМРӮЗ-РӮЗИ БАЙНАЛМИЛАЛИИ ҲИФЗИ ПИРЯХҲО. Ҳифзи пиряхҳо аз обшавии босуръат ҳамкории дастҷамъонаи давлатҳо ва созмонҳои байналмилалиро тақозо менамояд
Пешвои миллат: «Тоҷикистони маҳбуби мо воқеан Ватани аслии Наврӯз аст»
Бузургии Зан-Модар- ин олиҳаи ҳаёт ҳамеша вирди забони башарият аст
Рӯзи Модар рамзи эҳтиром ва қадршиносии махсуси давлату ҳукумати Тоҷикистон нисбат ба Зан-Модар мебошад
Пешвои миллат дар таҳкими мақоми Зан-Модар дар ҷомеи Тоҷикистон нақши намоён доранд
Модар олиҳаи накугавҳар ва азизтарин шахсияти башар аст
СОЛИ БАЙНАЛМИЛАЛИИ ҲИФЗИ ПИРЯХҲО. Тоҷикистон дар сатҳи ҷаҳон чун ташаббускори муҳими ҳалли мушкилоти глобалӣ шинохта шудааст